New York shahrida yana bir noodatiy norozilik aksiyasi jamoatchilik e’tiborini tortdi. Ijtimoiy tarmoqlarda tarqalgan xabarlarga ko‘ra, mahalliy rassom Skott LoBaido shahar meriyasi binosi — City Hall oldiga balandligi taxminan 1,8 metr bo‘lgan o‘rta barmoq shaklidagi haykalni o‘rnatgan.
Ma’lum qilinishicha, ushbu installyatsiya shaharning amaldagi meri Zohran Mamdani yuritayotgan siyosatga qarshi norozilik ramzi sifatida talqin qilinmoqda. Tanqidchilarning fikricha, mer tomonidan amalga oshirilayotgan fiskal o‘zgarishlar va iqtisodiy qarorlar oddiy ishlovchi qatlam manfaatlariga zid bo‘lib, ijtimoiy tengsizlikni kuchaytirishi mumkin.
San’at asari qisqa vaqt ichida ijtimoiy tarmoqlarda keng tarqalib, turli fikr-mulohazalarga sabab bo‘ldi. Ba’zilar uni erkin fikr bildirish va san’at orqali norozilik ifodasi sifatida qo‘llab-quvvatlayotgan bo‘lsa, boshqalar buni haddan tashqari keskin va hurmatsiz ishora sifatida baholamoqda.
Mutaxassislarning qayd etishicha, bunday installyatsiyalar ko‘pincha jamiyatdagi ijtimoiy va iqtisodiy keskinlikni ochiq ifodalash vositasiga aylanadi. Ayniqsa, budjet, soliqlar va ijtimoiy siyosat bilan bog‘liq masalalar dolzarb bo‘lgan davrda bunday ramziy aksiyalar tezda rezonans uyg‘otadi.
Hozircha shahar ma’muriyati yoki Nyu-York politsiya departamenti tomonidan ushbu holat yuzasidan rasmiy munosabat bildirilmagan. Shuningdek, haykalning keyingi taqdiri qanday bo‘lishi ham hozircha noma’lumligicha qolmoqda.
“Zamin”ni Telegramʻda oʻqing!
