Rossiya prezidenti Vladimir Putin 29 may kuni Qozog‘iston poytaxti Ostona shahrida o‘tkazilgan Yevrosiyo iqtisodiy ittifoqi sammiti yakunlari bo‘yicha matbuot anjumanida ishtirok etdi. Kreml rahbari o‘z chiqishida YEOII doirasidagi hamkorlik, milliy valyutalardagi hisob-kitoblar va Armanistonning tashqi siyosiy yo‘nalishi haqida fikr bildirdi.
Putinning ta’kidlashicha, Rossiya uchun Yevrosiyo iqtisodiy ittifoqiga a’zo davlatlar bilan ittifoqchilik aloqalarini chuqurlashtirish ustuvor vazifalardan biri bo‘lib qoladi. U YEOII doirasida tovarlar, xizmatlar, kapital va ishchi kuchining umumiy bozorlari shakllanganini qayd etdi. Rossiya prezidentining so‘zlariga ko‘ra, o‘tgan yili ittifoq mamlakatlari o‘rtasidagi tovar ayirboshlash hajmi 95 milliard dollarga yetgan.
Shuningdek, Putin YEOII mamlakatlari o‘rtasidagi hisob-kitoblarning qariyb barchasi milliy valyutalarda amalga oshirilayotganini ta’kidladi. Uning fikricha, tashkilotga a’zo davlatlar asosiy oziq-ovqat mahsulotlari bo‘yicha o‘zini mustaqil ta’minlashga intilayotgani ham muhim iqtisodiy yo‘nalishlardan biri hisoblanadi.
Matbuot anjumanida Rossiya rahbari Armaniston masalasiga ham alohida to‘xtaldi. U Rossiya va Armaniston o‘rtasida “alohida munosabatlar” mavjudligini aytib, Yerevan G‘arb bilan yaqinlashish bo‘yicha qanday qaror qabul qilmasin, bu aloqalarni butunlay buzmasligini bildirdi. Biroq Putin Yevrosiyo iqtisodiy ittifoqi doirasida gap birinchi navbatda iqtisodiy manfaatlar haqida ketayotganini urg‘uladi.
Uning ta’kidlashicha, agar Armaniston Yevropa Ittifoqi standartlariga o‘tishni boshlasa, Rossiya va YEOII doirasidagi iqtisodiy integratsiya masalalari qayta ko‘rib chiqilishi mumkin. Putin bu holatda Armaniston mahsulotlari, jumladan, vino eksporti, temiryo‘l tariflari, energiya narxlari va Rossiyada ishlaydigan Armaniston fuqarolari maqomiga ta’sir bo‘lishi mumkinligini aytdi.
Rossiya prezidenti Ukrainadagi inqirozni ham eslab, uning boshlanishini Kiyevning Yevropa Ittifoqi bilan yaqinlashish harakatlari bilan bog‘ladi. Shu bilan birga, u Yevrosiyo ittifoqi Armanistondan a’zolik bo‘yicha referendumni imkon qadar tezroq o‘tkazishni so‘rayotganini bildirdi.
Eslatib o‘tamiz, Armaniston bosh vaziri Nikol Pashinyan Ostonadagi YEOII sammitida ishtirok etmadi. Avvalroq Yerevan Yevropa Ittifoqi bilan yaqinlashish siyosatini tanlagani haqida xabarlar tarqalgan edi. Bu esa Armanistonning Yevrosiyo iqtisodiy ittifoqidagi kelajagi atrofida yangi muhokamalarni kuchaytirmoqda.
Qisqasi, Ostonadagi sammitdan keyin Putin YEOII mamlakatlari bilan iqtisodiy hamkorlikni Rossiya uchun muhim ustuvor yo‘nalish deb atadi. Armaniston masalasida esa u ochiq signal berdi: siyosiy tanlovlar alohida, ammo iqtisodiy integratsiyada har bir qarorning o‘z narxi bor.
“Zamin”ni Telegramʻda oʻqing!
