Turkmaniston jinoiy olamida “Bin Laden” laqabi bilan tanilgan mahkum Rasul Gulmamedov vafot etdi. Bu haqda “Xronika Turkmenistana” nashri xabar tarqatdi.
Ma’lum qilinishicha, u 10 aprel kuni Ovadan-Depe hududida joylashgan AH-E/3 maxsus tartibli koloniyada hayotdan ko‘z yumgan. Gulmamedov orziqib kutilayotgan 55 yoshini nishonlashga atigi bir necha hafta qolgan edi. Dastlabki ma’lumotlarga ko‘ra, uning o‘limiga infarkt sabab bo‘lgan.
Rasul Gulmamedov o‘zining mashhur laqabini “Al-Qoida” rahbari va xalqaro terrorchi sifatida tanilgan Usama bin Laden nomi bilan bog‘lab olgan. To‘qsoninchi yillar o‘rtalarida Turkmaniston huquq-tartibot organlari uning uyidan katta miqdordagi giyohvandlik vositalari hamda qurol-yarog‘ zaxirasini aniqlagan. Ular orasida avtomatlar, pulemyotlar va hatto hovlisida chuqurga yashirilib, somon bilan berkitilgan zirhli transport vositasi ham bo‘lgani aytilgan.
Xabarlarga ko‘ra, bu qurol va texnikalarning aksariyatini u 1989 yilda Afg‘onistondan chiqib ketayotgan SSSR harbiylaridan sotib olgan yoki giyohvand moddalarga almashtirgan. Shu bilan birga, ayrim manbalar zirhli transportyor haqidagi ma’lumotlar kuch tuzilmalari tomonidan voqeani yanada shov-shuvli ko‘rsatish uchun to‘qib chiqarilgan bo‘lishi mumkinligini ham ta’kidlaydi.
Shunga qaramay, o‘sha davrda “Bin Laden” huquqni muhofaza qiluvchi organlardan yashirinib, sobiq SSSR hududidagi davlatlardan biriga ketishga muvaffaq bo‘lgan. Biroq 2001 yilda noma’lum sabablarga ko‘ra Turkmanistonga qaytgan va 25 yillik qamoq jazosiga hukm qilingan. Shundan so‘ng u ozodlikka chiqmagan. Gulmamedov Ovadan-Depe qamoqxonasida kamida uch marta jazo muddatini o‘tagan.
Nashr ma’lumotlariga ko‘ra, u qamoqxona tartib-qoidalariga bo‘ysunishni istamaydigan, rasmiy ishlarda qatnashmaydigan mahkumlar qatoriga kirgan. Qamoqxona ma’muriyati ham unga bosim o‘tkazishdan ehtiyot bo‘lgan. Sababi, u mansub bo‘lgan baluj millatiga tegishli yuzlab mahkumlarni o‘z atrofiga jamlab, tartibsizlik keltirib chiqarishi mumkinligi aytilgan.
Shu bois unga qamoqxona sharoiti uchun nisbatan imtiyozli imkoniyatlar yaratilgani, jumladan, xizmatkori bilan alohida kamerada yashash, ko‘p sonli uchrashuvlar o‘tkazish va oziq-ovqat posilkalarini qabul qilish huquqi berilgani qayd etilmoqda.
“Zamin”ni Telegramʻda oʻqing!
