Afg‘onistonda ijtimoiy islohotlar bilan harbiy tribunal shug‘ullanadi

^{Foto: «News.day.az»}
Toliblar Afg‘onistonda «shariatga amal qilinishini ta’minlash», «diniy qoidalarni bajarish» va «ijtimoiy islohotlar» bilan shug‘ullanuvchi harbiy tribunalni tuzdi. Bu haqda «Tolibon» vakilining o‘rinbosari Imonulla Samanganiga tayanib, «Interfaks» xabar berdi.

«Tolibon» yetakchisi Haybatulla Ohunzoda tribunalga rais va ikki nafar sudya tayinlangan.

«Harbiy tribunal eshitish, qayta ko‘rib chiqish va shariat hukmlari asosida xavfsizlikning uch organi — Oliy yetakchi tomonidan tasdiqlanadigan Mudofaa, Ichki ishlar vazirliklari va Razvedka bosh boshqarmasi a’zolari hamda mansabdorlariga nisbatan hukm chiqarish huquqiga ega», — deydi Samangani.

Avvalroq harakat rahbari Haybatulla Ohunzoda «Tolibon» muvaqqat hukumati shariat qonunlarini qo‘llab-quvvatlashi, inson huquqlarini himoya qilishi va xorijiy sarmoyalar uchun imkoniyat yaratishini ma’lum qilgandi.

Eslatib o‘tamiz, 7 sentabr kuni «Tolibon» harakati Afg‘oniston hukumatining yangi tarkibini e’lon qildi. Zabihulla Mujohid Vazirlar Mahkamasining a’zolari ro‘yxatini ommaga taqdim qilgan, uning o‘zi hukumatda madaniyat va axborot vaziri lavozimini egalladi.

Qayd etilishicha, Muhammad Hasan Ohund «Tolibon» tuzgan yangi hukumatning rahbari bo‘ladi. Ohund «Tolibon» yetakchilarining rahbari hisoblanardi va avvalgi AQSH homiyligidagi hukumat qo‘shiniga qarshi urushda guruhni boshqargan. Qandahorlik yetakchi «Tolibon» asoschilaridan biri hisoblanadi. “Zamin” yangiliklarini “Facebook”da kuzatib boring