Sadir Japarov qirgʻizistonliklarga oltin olishni maslahat berdi

Qirgʻiziston prezidenti Sadir Japarov Rossiyaning Ukrainadagi harbiy harakatlari va Rossiyaga nisbatan joriy etilgan sanktsiyalar tufayli “birdan keskinlashgan xalqaro vaziyat va jahon bozorlaridagi vaziyat” munosabati bilan xalqqa murojaat yoʻlladi.

U qirgʻiz xalqini qishloq xoʻjaligi mahsulotlari etishtirishni koʻpaytirishga va jamgʻarmalarini oltin sotib olishga sarflashga chaqirdi.

“Mamlakatimiz yoqilgʻi narxining sezilarli darajada oshishi sababli qiyinchiliklarni boshdan kechirmoqda. Un va boshqa don mahsulotlari narxi sezilarli darajada oshdi. Bularning barchasi iqtisodiyotimiz hali ham koronavirus pandemiyasidan tiklanmagan bir paytda sodir boʻlmoqda. Balki yaqin kelajakda milliy valyutamizga nisbatan bosim kuchayishi mumkin. Xalqaro vaziyat xorijda ishlayotgan vatandoshlarimizga ham salbiy ta'sir koʻrsatishi mumkin”, – deb yozdi Japarov Feysbukdagi sahifasida.

U Qirgʻiziston Vazirlar Mahkamasi tomonidan Inqirozga qarshi chora-tadbirlar rejasi ishlab chiqilgani, tashqi ta'sirlarning respublika fuqarolariga ta'sirini yumshatish boʻyicha maxsus choralar koʻrilishini ta'kidladi.

“Bugungi kunda eng muhimi, butun aholi uchun ham, har bir oila uchun ham oziq-ovqat xavfsizligini ta'minlashdir. Shuning uchun hozir birorta dala ekinsiz qolmasligi uchun hamma narsani qilyapmiz. Qishloq xoʻjaligi mahsulotlarini oʻzimizda ishlab chiqarish va ularni keyinchalik qayta ishlashni sezilarli darajada oshirishimiz kerak. Har bir tomchi suv qadrli, biz hozirda kanal va ariqlarni tozalash, namlikni tejash uchun barcha zarur mablagʻlarni ajratdik”, – dedi Qirgʻiziston rahbari.

Japarov, shuningdek, fuqarolarga omonatlarini saqlab qolish uchun oltin quymalar sotib olishni tavsiya qilib, oltin qadrsizlanmasligini aytdi.

“Biz oltin yombilarni istalgan miqdorda sotib olish tartibini soddalashtirdik. Har qanday valyutaning qiymati doimiy ravishda pasayib boradi. Faqat oltinimizning narxi oshib bormoqda. Shu bois puli bor fuqarolarimiz milliy bankdan 1 grammdan 13 kilogrammgacha boʻlgan oltin yombilarni istalgan miqdorda xarid qilishlari mumkin. Chet elga eksport qilish uchun hech qanday cheklovlar yoʻq va hech qanday toʻlov olinmaydi. Biz shunday sharoitlarni yaratdik. Kapitalingizni qogʻoz pul oʻrniga oltin bilan yaxshiroq saqlang”, – deya taklif qildi prezident. “Zamin” yangiliklarini “Telegram”da kuzatib boring