Ramzan Qodirov Ukrainada ikki chechenistonlik askar halok boʻlganini aytdi

^{Foto: Checheniston matbuot xizmati}
Ukrainadagi urushda ikki nafar chechenistonlik askar halok boʻldi, yana olti nafari turli ogʻirlikdagi jarohatlar oldi, dedi respublika rahbari Ramzan Qodirov.

«Ha, urushda halok boʻlishmoqda, bu ularning kasbi taqozosi», — dedi Checheniston rahbari va respublika harbiy xizmatchilari «har qanday buyruqni» bajarishga tayyorligini eslatib oʻtdi.

Qodirov Rossiya hukumatini Ukrainada «fashistlar va terrorchilarni yoʻq qilish boʻyicha keng koʻlamli chora-tadbirlarni qoʻllashga», ukrainalik harbiylarni esa «rus qoʻshinlari bilan elkama-elka turishga» yana bir bor chaqirdi.

Avval ham Qodirov Rossiyaning Ukrainadagi harbiy amaliyotini oʻta sekin deb atab, «Ukrainaning barcha yoʻnalishlari va hududida keng koʻlamli operatsiya» oʻtkazishga chaqirgandi.

Rossiya 24 fevraldan beri Ukrainada «harbiy maxsus operatsiya» oʻtkazmoqda. Rossiya Mudofaa vazirligi jangovar harakatlar haqida xabar berib, halok boʻlgan harbiy xizmatchilar haqida ma'lumot bermayapti. Rossiya armiyasi yoʻqotishlari toʻgʻrisida urushning toʻrtinchi kunida tan oldi, ammo qurbonlar sonini aytmadi va ukrainaliklarnikidan «bir necha baravar» kam ekanini ta'kidladi.

Ayrim rossiyalik harbiylarning oʻlimi hududlar rahbarlarining hisobotlaridan ma'lum boʻldi. Rasmiylar birinchi marta 26 fevral kuni Ukrainadagi urushda rossiyalik ofitser halok boʻlganini tasdiqladi. Oʻshanda Dogʻiston rahbari Sergey Melikov halok boʻlgan ofitser Nurmagomed Gadjimagomedovning oilasiga hamdardlik bildirgan. Oʻz navbatida, Qalmogʻiston rahbari Batu Xasikov va Kursk viloyati gubernatori Roman Starovoyt shartnomaviy xizmat serjantlari Konstantin Manjiev va Andrey Ilyinning oʻlimi haqida gapirgan.

Ukraina Mudofaa vazirligining 28 fevraldagi ma'lumotlariga koʻra, urushda 5300 ga yaqin rossiyalik halok boʻlgan. Ukraina oʻz harbiylari orasidagi qurbonlar soni haqida hisobot bermayapti. “Zamin” yangiliklarini “Telegram”da kuzatib boring