«Askarlar bizni otib tashlamoqchi boʻldi» — Ukrainadan qaytgan oʻzbekistonlik ayol

Ukrainada davom etayotgan harbiy harakatlar sababli koʻplab davlatlar oʻz fuqarolarini mamlakatdan evakuatsiya qilmoqda. 28 fevral kuni Ukrainada yashayotgan 251 nafar oʻzbekistonlik ham Polsha orqali Toshkent shahriga olib kelindi. «Daryo» muxbiri evakuatsiya reyslarining dastlabkisida Oʻzbekiston fuqarolari bilan suhbatlashdi.

Kievda oilasi bilan 4 yildan beri yashab kelgan Barno Sobirova Polsha chegarasiga etib olguncha boʻlgan vaqtda boshidan oʻtgan voqealarni soʻzlab berdi.

«Ukrainada ‘dom'da yashardik. 24 fevral kuni bomba portlab, uyimiz derazalari tebranib ketdi. 25 fevralgacha urush toʻxtar deb oʻyladik. Keyin erim: ‘Toʻxtamaydi, shekilli, hamma Polshaga qarab ketyapti’, — dedi. Oʻzimizning mashinamiz bor edi. Biz ham unda Polshaga qarab yoʻlga chiqdik. Mashinada ketyapmiz, orqamizda qolgan erlarda portlashlar boʻlyapti. Agar bir soat kechikkanimizda Kievdan chiqa olmay qolar edik. Toʻgʻrisi, hayotdan umidimni uzgandim. Orqamizdan etib kelishadi, deb oʻyladim. Koʻchada tanklar, ‘soldat'lar turganini koʻrdim. Juda ham qattiq qoʻrqdim. Tanklar orasidan oʻtib ketdik. Ukrainadan Polsha chegarasiga kelguncha mashinalar juda tirband edi. Koʻplari ‘avariya’ boʻlib ketgan. Tirbandlikdan amallab oʻtib oldik.

Bizni yana qattiq qoʻrqitgan holat bilmagan holda boshqa yoʻldan yurgan ekanmiz. U erdan ukrain askarlari chiqdi. Ular bizni dushman deb oʻylashdi. Hatto otib tashlamoqchi boʻlishdi. Bolam va meni koʻrib, Ukrainadan qochib kelayotgan odamlar ekanimizga ishonishdi. Keyin bizni qoʻyib yuborishdi. Ularning avtomatlarini koʻrib qoʻl-oyogʻim titrardi. Mashinada erimning oʻrtoqlari ham bor edi. Ular: ‘Bir oʻlib tirilgandek boʻldik’, deyishdi.

Yoʻlda 2 kun yurdik. Erim mashinani uxlamasdan haydadi. Tirbandlikda ‘avariya’ boʻlib yotgan mashinalarni koʻrib qoʻrqdim. Biz bu yoʻllardan oʻta olarmikanmiz, yurtimizga qayta olarmikinmiz, deb rosa oʻyladim. Keyin Polsha chegarasiga keldik. U erda bizni Oʻzbekiston elchixonasi xodimlari yaxshi kutib oldi. Oziq-ovqat bilan ta'minlashdi. Prezidentimizga Polshaga samolyot qoʻyganlari uchun rahmat aytamiz. Xudoga shukr, vatanga qaytish nasib qildi.

Mashinamiz hozir Ukraina—Polsha chegarasida qolgan. Erim ham Polshada qolib ketdilar. Chunki anchadan beri Ukrainada yashayotgan edik. Eng yomoni, yillar davomida topgan pullarimizning hammasi qolib ketdi. Bir tiyin pulsiz yoʻlga chiqdik. Shuning uchun erim pul ishlab keyin boraman, deb qoldi», – deydi ilk reys bilan Toshkent shahriga uchib kelgan xorazmlik yoʻlovchi.

Yana bir yoʻlovchi Shahriyor Eshonov ham Kiev shahrida yashagani, Oʻzbekistonga qaytguncha nimalar yuz bergani haqida gapirdi.

«Ukrainada urush boshlangan vaqtda bir kecha metroda tunab qoldik. Ertasiga Polshaga qarab yoʻl oldik. Biz Kievdan chiqib ketganimizdan soʻng, koʻprik portlatilib, shaharda urush boshlanib ketgan. Bizdan 2 kilometr uzoqlikda kuchli portlash ovozi eshitildi. Bomba portlaganda er qimirlab ketdi. Koʻchalarda odamlar ham, mashinalar ham juda kam edi. Bor mashinalar ham boshqa davlat yoki shaharga ketayotganlarga tegishli. U erda oʻzbeklar bir-biriga yordam berdi. Mashinasi borlari qolgan vatandoshlarini Lvovgacha eltib qoʻydi. Polshaga borganimizda Oʻzbekiston elchixonasi vakillari bizni kutib olishdi. Biz uchun hamma sharoitlar yaratib berildi. Oʻzbekiston hukumatiga rahmat», – dedi u.

Transport vazirligi matbuot kotibi Navroʻz Ashurmatovning ta'kidlashicha, Ukrainadan evakuatsiya qilinadigan oʻzbekistonliklar uchun etarlicha reyslar yoʻlga qoʻyiladi.

«Hukumatimiz tomonidan Ukrainadagi fuqarolarimizni evakuatsiya qilish, ularni mamlakatga xavfsiz etkazib kelish boʻyicha tizimli ishlar qilinyapti. Tegishli vazirlik va idoralar tomonidan maxsus tezkor shtab tashkil etilgan. Tashqi ishlar vazirligi Ukrainadagi fuqarolarimizni mamlakatning turli shaharlaridan toʻplab, Polsha hududiga olib oʻtmoqda va u erdan maxsus reyslar orqali Oʻzbekistonga joʻnatmoqda. Reyslarning barchasi hukumat tomonidan bepul amalga oshirilmoqda. Ushbu reyslarda kelgan yoʻlovchilardan chipta uchun hech qanday toʻlov undirilmaydi. Shu oʻrinda ayrim ijtimoiy tarmoqlarda mazkur reyslarga chiptalar sotilayotgani haqidagi turli yolgʻon xabarlar tarqalmoqda. Fuqarolarimizdan bu kabi xabarlarga ishonmasliklarini soʻrab qolamiz. Vaziyatdan kelib chiqqan holda fuqarolarni Tashqi ishlar vazirligi tomonidan xavfsiz hudud — Polshaga olib oʻtilishi bilan yana qoʻshimcha reyslarni tashkil etilishi koʻzda tutilgan», — dedi vazirlik vakili.

Avvalroq 28 fevral kuni Ukrainadan Oʻzbekistonga 251 nafar fuqaro maxsus reyslar orqali olib kelingani xabar qilingandi. 1 mart kuni esa yana 258 kishi Toshkent xalqaro aeroportiga etib keldi.

Ma'lumot uchun, Ukraina hududida boʻlgan 1,5 ming nafardan ziyod Oʻzbekiston fuqarosi Polsha orqali evakuatsiya qilinadi. Ayni paytgacha uchinchi samolyot evakuatsiya qilinayotgan oʻzbekistonliklarni Polshadan Toshkent xalqaro aeroportiga olib kelmoqda. 2 mart kuni yana ikkita reys amalga oshirilishi rejalashtirilgan. “Zamin” yangiliklarini “Telegram”da kuzatib boring