Pentagon Ukrainaga 15 ta davlatdan qurollar etkazib berilayotganini ma'lum qildi

^{Foto: Reuters}
Ayni vaqtda Ukrainaga dunyoning 15 ta mamlakatidan harbiy yordam koʻrsatilmoqda. Bu haqda Pentagon matbuot kotibi Jon Kirbiga tayanib, «Interfaks» xabar berdi.

U jurnalistlar bilan oʻtkazilgan brifingda AQSh Ukrainaga harbiy yuklarni yuborishni davom etayotganini tasdiqlab, «bu nafaqat bizga, balki 14 ta boshqa davlatlarga ham taalluqli» deya qoʻshimcha qilgan. Kirbining soʻzlariga koʻra, AQSh «mazkur yuklar ukrain harbiylarining qoʻliga etib borishiga» ishonadi.

Pentagon vakilining ta'kidlashicha, AQSh mudofaa vaziri Lloyd Ostin «oʻtgan dam olish kuni NATOning sharqiy qanotidagi AQSh kuchlarini kuchaytirish uchun Qoʻshma Shtatlardan Evropaga taxminan 500 ga yaqin qoʻshimcha amerikalik harbiy xizmatchilarni yuborishni buyurgan».

Ushbu harbiy xizmatchilar «Ukraina atrofidagi mavjud vaziyatga javob qaytaradigan va NATO alyansining ushlab turish potentsiali hamda mudofaa qobiliyatini kuchaytiradigan tarzda joylashtiriladi».

«Mazkur choralar vaqtincha boʻlib, sharoit taqozo etadigan talablarga mos ravishda muntazam oʻzgarib turadi», — deya qayd etadi amaldor.

Uning ta'kidlashicha, AQSh Ukrainaga qoʻshin kirgizmayapti va buni amalga oshirmaydi ham.

Avvalroq AQSh prezidenti administratsiyasi Kongressdan Ukraina inqirozini tartibga solish bilan bogʻliq harakatlar uchun 6,4 milliard dollar ajratishni soʻragan edi. 2022 yilda AQSh Ukrainaga xavfsizlik sohasida yordam sifatida 650 million dollar va gumanitar yordam maqsadida 52 million dollar ajratgan. Mamlakat 2014 yildan buyon AQShdan umumiy qiymati 2,7 milliard dollarga teng yordam olgan.

Bundan oldin Evrokomissiya Ukrainaga 1,2 milliard evro ajratishni ma'qullagan, shuningdek yanvar boshida AQSh administratsiyasi Ukrainaga qoʻshimcha 200 million dollarlik harbiy yordam koʻrsatishni 2021 yil dekabrida ma'qullagani, 2022 yil 1 fevralda esa AQShdan yana 84 tonna harbiy yordam Ukrainaga etkazib berilgani xabar qilingan. “Zamin” yangiliklarini “Telegram”da kuzatib boring