Estoniya hukumati o‘z fuqarolariga Rossiya va Belarus harbiylariga yordam ko‘rsatishni taqiqladi

^{Foto: «RIA Novosti»}
Estoniya hukumati o‘z fuqarolariga Ukrainadagi harbiy operatsiyalar vaqtida Rossiya va Belarus harbiy xizmatchilariga yordam berishni taqiqladi. Mazkur taqiqni buzgan shaxslar jarimaga tortilishi yoki 5 yilgacha ozodlikdan mahrum etilishi mumkin, deb xabar beradi «Kommersant’».

Estoniya hukumatining qaroriga ko‘ra, Rossiya va Belarus qurolli kuchlariga hamda tuzilmalariga qo‘shilish, ularga harbiy yoki harbiy bo‘lmagan yordamni ko‘rsatish yoki «boshqa tarzda ularning faoliyatida ishtirok etish» taqiqlanadi. Taqiq Estoniya hududidagi barchaga, shuningdek, uning fuqarolari va xorijdan turib Estoniyada ro‘yxatdan o‘tgan yuridik shaxslariga ham taalluqli.

«Maqsad — tajovuzkorlar tomoniga yangi odamlarni jalb qilish yoki ularga yordam ko‘rsatishning oldini olish orqali Estoniya xavfsizligini himoya qilish, shuningdek, xalqaro xavfsizlik va tinchlikni qayta tiklashni qo‘llab-quvvatlash», — deyiladi mamlakat hukumati saytida e’lon qilingan press-relizda.

Rossiya prezidenti Vladimir Putinning buyrug‘i bilan 24 fevraldan buyon Ukrainada harbiy operatsiyalar o‘tkazilmoqda. Buning fonida G‘arb davlatlari Kiyevga qurol-yarog‘ yetkazib berishni oshirgan. Xususan, Estoniya Ukrainaga tankka qarshi Javelin raketalari va zenit qurollarini yetkazib bergan. Shuningdek, Finlyandiyaning ruxsati bilan Estoniya hukumati Kiyevga sovet davrida ishlab chiqarilgan 122 millimetrli gaubitsalarni ham yuboradi. “Zamin” yangiliklarini “Vkontakti”da kuzatib boring