Ukrainani tark etgan qochqinlar soni 4,5 milliondan oshdi

^{Foto: Reuters}
Birlashgan Millatlar Tashkilotining hisob-kitoblariga ko‘ra, Ukrainani tark etgan qochqinlar soni 4,5 million kishidan oshdi. Bu haqda BMT Qochqinlar ishlari bo‘yicha Oliy komissarligi boshqarmasi saytida aytilgan.

Boshqarma ma’lum qilishicha, 24 fevraldan buyon 4 million 503 ming 954 nafar qochqin Ukrainaning qo‘shni davlatlar bilan chegarasini kesib o‘tgan.

^{Foto: Reuters}
Xususan, 2 million 593 ming 902 nafar qochoq Polsha, 686 ming 232 nafari Ruminiya, 419 ming 101 nafari Vengriya, 410 ming 882 nafari Moldova, 404 ming 418 nafari Rossiya, 314 ming 485 nafari Slovakiya va 19 ming 96 nafari Belarus chegaralarini kesib o‘tgan.

Bu raqamlarga qo‘shimcha ravishda BMT 18—23 fevral kunlari Ukrainaning Donetsk va Lugansk viloyatlaridan 113 ming kishi Rossiyaga qochganini ham xabar qildi.

^{Foto: Reuters}
Tashkilotda ta’kidlanishicha, yevrohududga kelgan qochqinlarning Yevropa Ittifoqining boshqa mamlakatlariga, masalan, Italiya, Germaniya, Fransiya va Chexiyaga ko‘chib o‘tishda davom ettirmoqda. Ba’zilar AQSH, Buyuk Britaniya va Avstraliyaga ketmoqda.

Avvalroq BMT jarayon ko‘lami va tezligidan kelib chiqib, sodir bo‘layotgan voqealarni Ikkinchi jahon urushidan keyingi eng yirik migratsiya inqirozi deb atagan edi. Shu bilan birga, xorijdagi ukrainalik qochqinlarning deyarli yarmi bolalardir.

Bundan tashqari, kamida 13 million kishi Ukrainani tark eta olmayotgani ma’lum qilingan. Rossiya va Ukraina urushi “Zamin” yangiliklarini “Telegram”da kuzatib boring