Chaqaloqlarga qachondan qo‘shimcha ovqat berish kerak?

Chaqaloq tug‘ilgandan keyingi hayotidagi eng muhim bosqichlardan biri — uning ovqatlanishini to‘g‘ri tashkil qilishdir. Ilgari turli yondashuvlar mavjud bo‘lgan bo‘lsa-da, hozirda Jahon sog‘liqni saqlash tashkiloti va pediatrlar qo‘shimcha ovqatga o‘tishda aniq tavsiyalar beradi.

Odatda, bola hayotining dastlabki 6 oyida faqat ona suti (yoki zaruratda sun’iy sut) bilan oziqlanishi tavsiya etiladi. Bu davrda hech qanday qo‘shimcha ovqat yoki suv kerak emas — ona suti barcha kerakli moddalarga boy.

6 oylikdan keyin esa bolaning o‘sayotgan organizmi ko‘proq energiya talab qiladi. Shu paytdan boshlab, ehtiyotkorlik bilan qo‘shimcha ovqatlar kiritilishi mumkin. Bola quyidagi belgilarni ko‘rsatsa, bu boshlash uchun mos vaqt bo‘lishi mumkin: boshini tutishi, qoshiq bilan ovqatga qiziqishi, kattalarning ovqatlanishini kuzatishi.

Qo‘shimcha ovqatlarni joriy qilishda:

• Har 3-5 kunda bitta yangi mahsulot beriladi.
• Ovqatlar ezilgan yoki pyure shaklida bo‘ladi.
• Dastlab sabzavotlar, keyinchalik mevalar, go‘sht va boshqa mahsulotlar kiritiladi.
• Tuz, shakar, achchiq yoki qovurilgan mahsulotlardan saqlanish kerak.
• Bolaning holati, reaksiyasi va axlatga bo‘lgan o‘zgarishlar kuzatilib boriladi.

Avvalgi ovqatlar sifatida sabzi, kartoshka pyuresi, suyuq guruch yoki grechka bo‘tqasi, olma yoki banan pyuresi tavsiya etiladi. Keyinroq — go‘sht va tuxum sarig‘i.

1 yoshgacha ona suti asosiy oziqlantiruvchi manba bo‘lib qoladi. Qo‘shimcha ovqat esa faqat qo‘llab-quvvatlovchi vosita.

Har bir bola alohida. Shuning uchun pediatr bilan maslahatlashgan holda harakat qilish eng to‘g‘ri yondashuv bo‘ladi. “Zamin”ni Telegramʻda oʻqing!