O‘tirib ishlovchi kishilar o‘z kunini to‘g‘ri tashkillashtirmasa, butun umrga surunkali kasalliklarni orttirib olishadi. Ofis ishchisiga tahdid soluvchi xavf – organizmning butun tizimini ishdan chiqaruvchi gipodinamiya. 8-10 soatlab kompyuter qarshisida o‘tirib, kam harakat qilganimiz bois energiya noto‘g‘ri taqsimlanadi va ortiqcha vazn shaklida to‘planadi. Ozish uchun ofis badantarbiyasi ushbu muammoni bartaraf etishga yo‘naltirilgan deb yozadi Kun.uz nashri.
Gipodinamiya – mushak faoliyatining yetishmovchiligi – sivilizatsiyaning jismoniy mehnatdan voz kechishi uchun “mukofot”idir. Kamharakatlik ko‘plab jiddiy kasalliklarni keltirib chiqaradi – bu eng avvalo, tayanch-harakat apparati kasalliklari, yurak-qon tomir kasalliklari, kichik tos organlari va, albatta, semizlik.
Bosh miya neyronlari uchun glyukoza zarur, shuning uchun aqliy mehnat bilan shug‘ullanuvchilar shirinliklarni yaxshi ko‘rishadi. Afsuski, organizm uglevodlarning ortiqchasini zahiraga yig‘ib qo‘yadi, bu yerda esa hali tushlik bor...
O‘troq ish bilan bog‘liq surunkali kasalliklar profilaktikasi hamda ishlab chiqarish samaradorligini yaxshilash uchun qachonlardir ish vaqtida badantarbiya bilan shug‘ullanish amaliyoti o‘tkazilgan. Bugunga kelib G‘arb va Yaponiyaning yirik kompaniyalari shunday yo‘l tutmoqda. G‘arbda sog‘lom xodimning stavkasi nimjon hamkasbinikidan yuqori. Kompaniyalar shu tariqa kasallik varaqasi va tibbiy sug‘urtadan tejaydi. Ba’zi xalqaro korporatsiyalarda bu punkt reglamentda aniq yozib qo‘yilgan: masalan, tamaki chekmaydigan xodim 5 foizli ustama haq oladi.
Ozish uchun ofis badantarbiyasi sizni juda yaxshi tetiklashtiradi: uyg‘onishga va qonni harakatga keltirishga yordam beradi. Keyin esa ishdagi vazifalaringizga qaytishingiz mumkin. Ishni bajarishga ulgurmaslikdan qo‘rqmang – badantarbiyadan keyin miya yangi qon bilan ta’minlanadi va siz tezroq fikrlay boshlaysiz. “Zdorove s Yelenoy Malыshevoy”da ozish uchun ofis badantarbiyasini qanday qilib to‘g‘ri tashkillashtirish mumkinligiga oid ma’lumotlar taqdim etildi.
- Tanaffuslarni badantarbiya daqiqalariga aylantiring. Badantarbiya – chekishni tashlash uchun ajoyib sabab. Chekishga ketgan vaqtingizni o‘z sog‘lig‘ingizni mustahkamlashga sarflang! Har ikki soatda badantarbiya mashqlarini bajaring va kompyuter qarshisidagi har 45 daqiqalik ishdan so‘ng kichik tanaffus qilishni unutmang.
- Hamkasblar bilan birga badantarbiya qiling. Ularni ishlab chiqarish samaradorligini oshiruvchi badantarbiya qilish zarurligiga ishontiring. Jismoniy mashqlarni birga bijarish jamoadagi o‘zaro munosabatlarni ham mustahkamlab, mashg‘ulotlarning doimiyligini nazorat qilishga yordam beradi.
- Rahbariyatni xabardor qiling. Bo‘lim rahbaringiz bilan gaplashing. Unga o‘z tashabbusingiz haqida ayting. Bu jamoadagi ish samaradorligini oshirishiga ishontiring. Ehtimol, jamoadagi nufuzini oshirish uchun uning o‘zi badantarbiya bilan shug‘ullangisi kelib qolar. Har qanday holatda ham sizning g‘oyangiz e’tiborsiz qolmaydi.
- Nonkonformist bo‘ling. Hamkasblaringiz tashabbusni qo‘llab-quvvatlashmasa, yolg‘iz o‘zingiz badantarbiya bilan shug‘ullaning. Hech nimadan uyalmang va boshqacha qarashlardan qo‘rqmang. Sog‘liq birinchi o‘rinda. Vaqt o‘tgach kimlardir sizning safingizga qo‘shilish ehtimoli yuqori.
- Piyoda yuring. Piyoda yurish imkoningiz bo‘lsa, transport vositalarini chetlab o‘ting. Avtomobillardan ko‘ra jamoatchilik transportlarini tanlang. Agar ko‘p qavatli binoda ishlasangiz, lift emas, zinadan foydalaning.
- Kuch talab qiluvchi mashqlardan qochmang. Ular sizga qiyindek tuyulsa-da, bunday mashqlar ham kerak. Ofis badantarbiyasidagi kuch talab qiluvchi mashqlarning aksariyati vaznni saqlab qolishga yo‘naltirilgan. Vaqt o‘tgan sari siz yanada kuchli bo‘lib, ularni ko‘proq bajara boshlaysiz.
- Tajriba qilishdan qo‘rqmang. Ikki oylardan keyin bunga o‘rganib ketasiz va bu mashqlar sizga haddan tashqari osondek tuyulishi ham mumkin. Badantarbiyaga aynan o‘zingizga to‘g‘ri keluvchi jismoniy mashqlarni ham qo‘shing.
- Stoldagi tartibni o‘zgartiring. Ko‘proq harakatlanishingiz uchun stoldagi predmetlarni o‘zingiz uchun maksimal noqulay holatda joylashtiring. Masalan, stepler stol ostida, telefon stolning uzoq burchagida va h.k. Umuman, smartfonni chetga surib, ish vaqtida o‘zingizni faol tuting.
- To‘g‘ri o‘tiring. Kompyuterda ishlashda to‘g‘ri o‘tirish kerakligi yodingizda bo‘lsin. Oyoqlaringizni chalishtirib o‘tirmang va bukchaymang. Xo‘jalik bo‘limi mudirini to‘g‘ri o‘tirishga mo‘ljallangan sifatli ofis kreslosini xarid qilishga ko‘ndiring.
- Fitnes – bahona emas. Ishdan tashqari vaqtda sport bilan shug‘ullansangiz ham, ofis badantarbiyasidan qochmang. Albatta, birgina badantarbiyadan ozib qolmaysiz, shunday bo‘lsa-da, u sizning asosiy ish kuningiz mazmunli o‘tishini ta’minlaydi.
Ctrl
Enter
Xato topdIngizmi?
Iborani ajratib Ctrl+Enter tugmasini bosingMavzuga oid yangiliklar
Slovakiya bosh vaziri Putinning taklifini qabul qildi
Organizmda qaysi turdagi vitamin yetishmayotganini qanday aniqlash mumkin?
Germaniya razvedkasi rahbari: “Rossiya yaqin yillarda NATOga hujum qilishi mumkin”
Erdo‘g‘on: “Turkiya G‘azo mojarosi tugamaguncha Falastinni qo‘llab-quvvatlaydi”
Gretsiyada minglab odamlar NATOga qarshi namoyish o‘tkazdi
Eron Isroil bilan keng ko‘lamli urushga tayyorligini ma’lum qildi
Bosh kiyimsiz yurishning organizmga qanday ta’siri bor?
Medvedev Rossiya NATO harbiy bazalariga zarba yo‘llashi mumkinligini istisno qilmadi
