Vasvasa

Ba’zida oynada aksimni ko‘rsam, soqolimni olib tashlagim keladi. Ehtimol bu shaytoniy vasvasadir, bilmadim. Ammo o‘z aksimga qarasam xayolimdan shunday fikrlar o‘tadi:

"Sen bu sunnat amalga loyiq bo‘la olmayapsan, shuncha muhim sunnatlar turib sen ko‘rinishga oid bo‘lgan soqol qo‘yish sunnatini tutibsan, ammo xarom amallardan bo‘lgan kibr, riyo, g‘iybat, chaqimchilik, xolis bo‘la olmaslik, ota onaga ters gapirish, qo‘shni haqlariga rioya qilish, omonatga vafo (omonatni ma’nosi ham juda keng), farzand tarbiyasi vojibotlari, ayolga zulm qilmaslik (ayol ham omonat), yaqinlarga silai rahm qilish, miskinlarga ehson berish... va yana ko‘plab solih amallarni bajarmay o‘zingcha soqol qo‘yib olganingga o‘laymi... Sen oldin o‘sha muhim sunnatlarni bajar, keyin senga soqol yarashadi." degan xayollar o‘tadi.

Ehtimol bu shaytonning vasvasasidir. Chunki, vasvasa ayni iymondir, degan hadis eshitgan edim.

Aslida, har bir inson o‘z qalbiga nazar solishi, o‘z yuragi bilan yolgiz qolib tergab turishi, qalbining eng tubidan chiqayotgan fikrlarni saralab turishi kerak ekan. Shundagina inson o‘zini isloh qila oladi, shundagina jamiyatdagi ijtimoiy aloqalar yuksaladi, shundagina orada ginalarga chek qo‘yiladi.

Zamonamizning eng og‘ir illati bu – har kim birovni xatosi bilan ovora bo‘lib, o‘zini unutishdir. Biz esa dinni xolis Alloh uchun qilishga buyurilganmiz. Vallohu a’lam.

Manba: Azon.uz “Zamin” yangiliklarini “Facebook”da kuzatib boring