Tesla aktsiyalari 25% ga tushdi – sabablari nima?

Tesla kompaniyasi oʻzining eng yirik elektromobil ishlab chiqaruvchisi maqomini saqlab qolishda qiyinchiliklarga duch kelmoqda. Xitoyda kuchayib borayotgan raqobatchilar va global bozorda Ilon Maskning siyosiy faolligi tufayli kompaniyaning biznesi zarar koʻrmoqda. Natijada, Tesla aktsiyalari dekabr oyidagi eng yuqori nuqtasidan 25% ga tushib ketdi.

Bloomberg xabariga koʻra, bu hafta Tesla aktsiyalari uchun oktyabrdan beri eng yomon haftalardan biri boʻldi, chunki ular 11% ga pasaydi. Yanvar oyida kompaniyaning elektromobil sotish natijalari ham bu pasayishga hissa qoʻshdi. Masalan, Germaniyada Tesla yetkazib berish hajmi 2021 yildan beri eng past darajaga tushdi, Fransiya va Buyuk Britaniya ham salbiy oʻsish koʻrsatdi. Xitoyda esa Tesla avtomobillarining yanvar oyidagi yetkazib berish hajmi yillik hisobda 11,5% ga, oʻtgan oyga nisbatan esa 30% dan ortiq kamaydi.

Tesla aktsiyalarining dekabr oyida koʻtarilishi asosan Ilon Maskning AQSh prezidenti saylovida gʻolib chiqqan Donald Trampga yaqinligi bilan bogʻliq edi. Ammo investorlar tez orada yangi prezident elektr transportni subsidiyalash dasturlarini qisqartirishni rejalashtirayotganini anglab etdilar, bu esa Tesla biznesiga salbiy ta'sir qiladi. Evropada Maskning siyosiy faolligi ham iste'molchilarning kompaniyaga nisbatan munosabatini yomonlashtirmoqda. Natijada, Tesla aktsiyalari yil boshidan buyon yirik texnologik kompaniyalar – Apple, Microsoft, Nvidia, Alphabet, Amazon va Meta ichida eng yomon natijalarni koʻrsatdi.

Analitiklar Tesla aktsiyalari yana 2-3 hafta davomida tushishini kutmoqda. Ba'zi investorlar uchun bu aktsiyalarni arzon narxda sotib olish imkoniyati boʻlishi mumkin. Hozirda Tesla aktsiyalarining bahosi $362 atrofida boʻlib, $350 darajasida mustahkamlanish ehtimoli bor. Bloomberg’ning oʻrtacha prognoziga koʻra, Tesla aktsiyalari kelasi 12 oy ichida $360 atrofida boʻlishi kutilmoqda. “Zamin” yangiliklarini “Telegram”da kuzatib boring