Qozog‘iston Markaziy banki mamlakat moliya bozorida yangi bosqichni boshlab berdi – Solana va Mastercard hamkorligida milliy valyutaga bog‘langan yangi steyblkoin pilot loyihasi yo‘lga qo‘yildi. Markaziy bank seshanba kuni Cointelegraph nashriga bergan rasmiy bayonotida raqamli aktivlarni qonuniy tartibga solish uchun maxsus yaratilgan “Digital Assets Regulatory Sandbox” doirasida loyiha amalga oshirilganini ma’lum qildi.
Yangi raqamli vosita Evo (KZTE) deb nomlanib, u to‘liq Qozog‘iston milliy valyutasi – tengega bog‘langan holda joriy etildi. Steyblkoinni mahalliy “Eurasian Bank” hamda Intebix kriptobirjasi chiqarmoqda, Solana blokcheyni esa asosiy texnologik poydevor sifatida xizmat qilmoqda. Shu bilan birga, Mastercard ham loyihani xalqaro steyblkoin emitentlari bilan bog‘lash orqali uni kengroq moliyaviy tizimga integratsiya qilishni maqsad qilgan.
Qozog‘istonning milliy steyblkoini kriptovalyutalar va an’anaviy bank tizimi o‘rtasida ko‘prik vazifasini bajarishi kutilmoqda. Markaziy bankning bayonotida ta’kidlanishicha, Evo steyblkoinidan foydalanish yo‘nalishlari juda keng:
- kriptovalyuta va fiat pullar o‘rtasidagi aloqani kuchaytirish;
- raqamli aktivlarni ayirboshlash operatsiyalarini yengillashtirish;
- kripto-kartalar orqali tranzaksiyalarni amalga oshirish.
Loyiha mamlakatning raqamli aktivlar bozorini rivojlantirish strategiyasining muhim qismi sifatida ko‘rilmoqda. Maqsad – innovatsion moliyaviy vositalarni joriy etish orqali milliy raqamli ekotizimni shakllantirish va Qozog‘istonni global raqamli moliyada yetakchi o‘yinchilardan biriga aylantirish.
Eslatib o‘tamiz, harchand Evo texnik jihatdan Intebix va “Eurasian Bank” tomonidan chiqarilsa-da, uning ishga tushirilishi hamda tartibga solish jarayoni to‘liq Markaziy bank tomonidan ta’minlanmoqda. Bu esa loyihaning shaffofligi va huquqiy asoslarini kafolatlaydi.
Yangi steyblkoin piloti nafaqat mamlakatda raqamli iqtisodiyot rivojini tezlashtiradi, balki mintaqadagi kripto-moliyaviy innovatsiyalarga yangi sur’at berishi ham kutilmoqda.
“Zamin”ni Telegramʻda oʻqing!
