2025 yil yakunlariga ko'ra, O'zbekistonda iste'mol narxlari indeksi yil davomida 7,3 foizga oshdi. Dekabr oyining o'zi esa umumiy ko'rsatkichga 0,9 foizlik qo'shimcha berdi — bu jarayonda oziq-ovqat ham, xizmatlar bozori ham faol harakatlandi. Bu haqda upl.uz xabar beradi.
Dekabrda eng katta tebranish oziq-ovqatda kuzatildi: narxlar bir oyda 1,5 foizga ko'tarildi, yil bo'yi jamlangan o'sish esa 5,5 foizni tashkil etdi. Mavsumiylik yana o'z so'zini dedi — baqlajon va bodring noyabrga nisbatan qariyb 56 foiz qimmatlashdi, pomidor narxi esa chorakga oshdi. Bolg'ar qalampiri va karam ham oldingi safda bo'lib, mos ravishda 22,9 va 22,8 foiz qo'shdi.
Asosiy mahsulotlar ichida dekabr “chempioni” tuxum bo'ldi — narx 3,4 foizga yuqoriladi. Go'sht va non yo'nalishida esa o'sish nisbatan sokin: non, mol go'shti va qo'y go'shti 0,5 foizdan qo'shdi. Respublikadagi bozorlarda mol go'shtining o'rtacha narxi kilogrammiga 500–1000 so'm atrofida ko'tarildi, parranda mahsulotlari esa segmentiga qarab 0,2–0,6 foiz qimmatlashdi.
Dekabrda ayrim pozitsiyalarda aksincha pasayish ham bo'ldi: sabzi 7,5 foiz, sitrus mevalar 2,4 foiz, shakar 2,3 foiz arzonladi. Guruch 1,8 foizga tushdi, uzoq vaqt o'sib kelgan kungaboqar yog'i esa 0,5 foizga arzonlashdi.
Yillik kesimda kartina boshqacha: 12 oyda qo'y go'shti 26,8 foizga, suyaksiz mol go'shti 25 foizga qimmatlashdi. Yil bo'yicha eng katta o'sish sitruslarda (+33 foiz) va karamda (+32 foiz) qayd etildi. Shu bilan birga, guruch o'tgan yilga nisbatan 16,6 foiz, bolg'ar qalampiri esa 15 foiz arzonlashdi.
2025 yilda inflyatsion bosimning asosiy “drayveri” xizmatlar sektori bo'ldi: yil yakunida bu yo'nalishdagi o'sish qariyb 14 foizga yetdi, dekabr hissasi esa 0,7 foizni tashkil qildi. Mobil aloqa tariflari dekabrda o'rtacha 4,9 foizga ko'tarilib, yil davomida 15,1 foizga oshgani e'tiborni tortdi.
Uy-joy kommunal xizmatlarida yillik o'zgarishlar eng keskin bo'ldi: tarmoqli gaz 39,2 foizga qimmatlashdi, ichimlik suvi va kanalizatsiya xizmatlari 35 foizga oshdi. Maishiy chiqindi olib chiqish xizmatlari 32,5 foizga ko'tarildi, elektr energiyasi esa 18,8 foiz qimmatlashdi.
Ta'lim xizmatlari ham chetda qolmadi: bolalar bog'chasi to'lovlari yil davomida 17 foizga oshdi, repetitor va til kurslari narxlari esa 6,6 foizga yuqoriladi. Transportda ham bosim sezildi — aviachipta 21,7 foizga, shahar avtobusidagi yo'l haqqi 21,1 foizga qimmatlashdi.
Yoqilg'i bozorida dekabr oyida benzin narxi 2,4 foizga o'sdi, yil hisobida esa yoqilg'i 11,9 foizga qimmatlashdi. AYoQShlarda narxlar diapazoni shunday: AИ-80 — 9500–9900 so'm, AИ-91/AИ-92 — 10 500–13 300 so'm, yuqori oktanli AИ-100 esa litriga 21 000 so'mgacha chiqdi.
Metan yil davomida 30 foizga qimmatlashdi, propan esa dekabrda o'sganiga qaramay, yil yakunida o'tgan yil oxiriga nisbatan 10,5 foiz arzonroq bo'lib turibdi. Nooziq-ovqat segmentida zargarlik buyumlari ham sezilarli ko'tarildi — qimmatbaho metallardan yasalgan uzuklar narxi bir yilda 28,7 foizga oshdi.
Bozorlarda barqarorlikni ushlab turish uchun ijtimoiy ahamiyatga ega tovarlar bo'yicha narxlar nazorati davom etmoqda — maqsad asossiz spekulyatsiyalarning oldini olish. Avvalroq aholining inflyatsion kutilmalari noyabrda so'nggi yillardagi eng past ko'rsatkichlardan biriga tushib, 11,8 foiz bo'lgani ham qayd etilgandi.
O'zbekistonda esa xalq orasida bir “klassik mezon” bor: non narxi ko'pchilik uchun inflyatsiyaning norasmiy, ammo eng aniq ko'rsatkichi sifatida qabul qilinadi — ba'zan u rasmiy statistika bergan “iste'mol savati” raqamlaridan ham ko'proq ishonch uyg'otadi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
