Prezident Shavkat Mirziyoyev mamlakatimizda to‘lovga qobiliyatsizlik institutini mukammallashtirish va moliyaviy ahvoli og‘irlashgan tadbirkorlik subyektlarini o‘z vaqtida qo‘llab-quvvatlash borasida yangi yo‘nalishlar bilan tanishdi. Bu boradagi tadbirlarda xususiy biznesni rivojlantirish, ishbilarmonlar uchun qulay muhit yaratish va ularning faoliyatini barqarorlashtirish bo‘yicha izchil strategiyalar taʼkidlandi.
Maʼlum bo‘lishicha, yurtimizda 300 mingdan ortiq yakka tartibdagi tadbirkorlar va 5,5 million o‘zini o‘zi band qilgan shaxslar faoliyat yuritmoqda. Xususiy sektorning iqtisodiyotdagi hissasi so‘nggi besh yilda 45 foizdan 58 foizga o‘sdi. Joriy yilda kichik va o‘rta biznesga 140 trillion so‘m kredit ajratilishi, banklar tomonidan jalb qilingan 8 milliard dollarlik tashqi resurslarni mahalliy tadbirkorlikka yo‘naltirish, shuningdek, ishlab chiqarish, savdo va xizmatlar infratuzilmasini yaxshilash uchun hududlarga 20 trillion so‘m mablag‘ ajratilishi belgilandi.
Shu bilan birga, hali ham moliyaviy qiyinchilikka duch kelgan korxonalarni erta bosqichda qo‘llab-quvvatlash masalasi yechimini kutayotganini ko‘rsatdi. Ayniqsa, faoliyat ko‘rsatmaydigan yoki faoliyati tugatilgan kichik korxonalar sonining ortishi, amaldagi tizim ko‘proq korxonani rasmiy tugatishga yo‘naltirilganligini namoyish etmoqda.
Taʼkidlanganidek, to‘lovga qobiliyatsizlik taomillari yetarli darajada qo‘llanilmayapti: moliyaviy ahvoli og‘irlashgan 93 mingta tadbirkorning faqat 10 mingtasi bo‘yicha ish qo‘zg‘atilgan. Sudgacha va sud sanatsiyasi tizimi samarali ishlamayapti, so‘nggi besh yilda atigi 68 ta korxonaga sanatsiya qo‘llanilib, faqat 7 tasining faoliyati tiklangan. Sud boshqaruvchilari faoliyatida ish muddatlari buzilishi, asossiz xulosalar va soxta bankrotlik alomatlarini o‘z vaqtida tekshirmaslik holatlari uchrab turishi qayd etildi.
Yangi institutsional yondashuvlar taklif etildi: Adliya vazirligi huzurida To‘lovga qobiliyatsizlik ishlari bo‘yicha agentlik tashkil etilishi, sud boshqaruvchilari faoliyatini muvofiqlashtirish va ularning malakasini oshirish uchun Palata yaratilishi nazarda tutilmoqda. Shuningdek, kichik va o‘rta tadbirkorlar uchun past foizli kredit liniyalari, kreditlarni sanatsiya qilish va moliyaviy tiklash mexanizmlari joriy etilishi belgilandi.
Taʼkidlanishicha, to‘lovga qobiliyatsizlik jarayonlarini raqamlashtirish muhim ahamiyatga ega. Elektron platforma orqali barcha arizalar, korxonalar va sud boshqaruvchilari reyestri yuritiladi, jarayonlar ommaviy axborot uchun ochiq qilinadi va monitoring tezlashtiriladi.
Prezidentning taʼkidicha, tadbirkorlikni qo‘llab-quvvatlashda yangi korxonalar tashkil etish bilan cheklanmasdan, mavjud biznesni saqlab qolish, vaqtincha qiyinchilikka tushgan korxonalarga o‘z vaqtida yordam berish, ularni iqtisodiy faollikka qaytarish muhimdir. Topshiriqlar to‘liq bajarilsa, sohada samarali boshqaruv va raqamli yechimlar orqali barqarorlik taʼminlanadi.
“Zamin”ni Telegramʻda oʻqing!
