Tether kompaniyasi tomonidan moliyalashtiriladigan Oobit kripto-toʻlov platformasi oʻz faoliyatini Kolumbiyada kengaytirdi. Bu kompaniyaning Lotin Amerikasidagi toʻqqizinchi bozori boʻlib, avvalroq Braziliya, Argentina va Chili kabi davlatlarda ham xizmatlar ishga tushirilgan edi. Chainalysis maʼlumotlariga koʻra, Kolumbiya pesosi markazlashtirilgan birjalarda stablecoin sotib olish hajmi boʻyicha dunyoda ikkinchi oʻrinda turadi. Bu haqda Cointelegraph.com xabar beradi.
Oobit platformasi foydalanuvchilarga oʻz hamyonlaridagi raqamli aktivlarni toʻgʻridan-toʻgʻri sarflash imkonini beradi. Visa tizimi bilan integratsiya qilingan ushbu yechim dunyoning 80 dan ortiq mamlakatidagi 150 milliondan ziyod savdo nuqtalarida qabul qilinadi. Bunda foydalanuvchilar mablagʻlarni anʼanaviy bank xizmatlari orqali konvertatsiya qilishga hojat qolmaydi.
Kompaniya maʼlumotlariga koʻra, Braziliyada 2024-yil noyabr oyidan beri faollik 200 foizdan oshgan. Tranzaksiyalarning asosiy qismini USDT tashkil etadi, undan keyingi oʻrinlarda Oobit tokeni va USDC turibdi. Lotin Amerikasi bozorlarida xaridlarning 35 foizi oziq-ovqat doʻkonlari va supermarketlar hissasiga toʻgʻri keladi.
Mintaqada stablecoinlarga boʻlgan talab ortib bormoqda. Bitso hisobotiga koʻra, 2025-yilda kripto-xaridlarning 40 foizini dollarga bogʻlangan stablecoinlar tashkil etgan, Bitcoin ulushi esa atigi 18 foizni qayd etgan. DefiLlama tahlillari esa stablecoinlar bozorining umumiy hajmi bir yil ichida 243 milliard dollardan 322 milliard dollardan oshganini koʻrsatmoqda.
“Zamin”ni Telegramʻda oʻqing!
