Raqamli aktivlar bozori oʻtgan hafta davomida institutsional investorlar taʼsirida shakllanishda davom etdi. Biroq, geosiyosiy keskinliklar kripto bozorining makroiqtisodiy sharoitlarga nisbatan sezgirligini yana bir bor koʻrsatdi. AQSH va Eron oʻrtasidagi munosabatlar fonida treyderlar xavfni kamaytirishga harakat qilishi natijasida raqamli aktivlar fondlaridan 1 milliard dollardan ortiq mablagʻ chiqib ketdi. Bu haqda Cointelegraph.com xabar beradi.
CoinShares maʼlumotlariga koʻra, ushbu chiqib ketish joriy yildagi eng yirik haftalik pasayishlardan biri boʻldi. Asosiy yoʻqotishlar Bitcoin va Ethereum mahsulotlariga toʻgʻri keldi. Bozor ishtirokchilari Bitcoinʻni makroiqtisodiy himoya vositasi deb bilsalar-da, keskin oʻzgaruvchanlik davrida investorlar hali ham raqamli aktivlarni yuqori xavfli instrumentlar sifatida baholamoqda.
Shu bilan birga, Tether kompaniyasi Twenty One Capitalʻdagi SoftBank ulushini sotib olib, sohadagi oʻrnini mustahkamladi. Strike asoschisi Jack Mallers boshchiligidagi ushbu kompaniya oʻz balansida 42,000 dan ortiq BTC toʻplagan. Ushbu bitim Tetherʻning Bitcoin xizmatlari bozoridagi taʼsirini yanada oshiradi va kompaniyaning moliyaviy xizmatlar koʻlamini kengaytirishga xizmat qiladi.
Bernstein tadqiqotlariga koʻra, Bitcoin maynerlari sunʼiy intellekt (AI) infratuzilmasini rivojlantirishda strategik hamkorlarga aylanmoqda. Maynerlar oʻz faoliyatini maʼlumotlar markazlari va yuqori samarali hisoblash tizimlari (HPC) yoʻnalishida diversifikatsiya qilmoqdalar. Bu esa ularga nafaqat kripto qazib olish, balki AI texnologiyalari poygasida ham muhim oʻrin egallash imkonini beradi.
Yana bir muhim yangilik Polymarket va Nasdaq hamkorligi boʻldi. Tomonlar xususiy kompaniyalar bilan bogʻliq prognoz bozorlarini ishga tushirish boʻyicha kelishib oldilar. Bu kabi qadamlar anʼanaviy moliya institutlarining kripto ekotizimiga integratsiyalashuvi davom etayotganidan dalolat beradi.
“Zamin”ni Telegramʻda oʻqing!
