Stablecoin emitenti boʻlgan Tether kompaniyasi SoftBank Groupʻning Twenty One Capitalʼdagi ulushini sotib olganini eʼlon qildi. Mazkur kelishuv natijasida Tether eng yirik ochiq aksiyadorlik Bitcoin egalaridan biri ustidan nazoratni yanada kuchaytirdi. SoftBank oʻzining taxminan 26 foizlik ulushini oshkor qilinmagan summaga sotgan. Bu haqda Cointelegraph.com xabar beradi.
Twenty One Capital 2025-yilda Cantor Fitzgerald koʻmagida Jack Mallers tomonidan Bitcoin gʻaznachilik kompaniyasi sifatida tashkil etilgan edi. SoftBank uning ilk investorlaridan biri boʻlgan. Mulkdor oʻzgarishi doirasida SoftBank vakillari Twenty One Capital direktorlar kengashini tark etadi. Bu tranzaksiya Tetherʼning kompaniya strategiyasi va boshqaruvidagi nufuzini sezilarli darajada oshiradi.
Hozirgi vaqtda Twenty One Capital gʻaznasidagi Bitcoin aktivlari qiymati taxminan 3,34 milliard dollarni tashkil etadi. Kompaniya faqatgina gʻaznachilik modeli bilan cheklanib qolmasdan, Bitcoinʼga asoslangan keng qamrovli moliyaviy xizmatlar, jumladan, kreditlash, mining va kapital bozorlari yoʻnalishida kengayishni rejalashtirmoqda.
Ushbu yangilik fonida chorshanba kuni ertalab Twenty One Capital aksiyalari 4 foizga koʻtarildi. Bu oʻsish dekabr oyida Nyu-York fond birjasida (NYSE) savdolar boshlanganidan beri kuzatilgan 37 foizlik pasayishning bir qismini qoplashga yordam berdi. Avvalroq Tether kompaniyasi Twenty One Capital va Strike toʻlov tizimining birlashishini qoʻllab-quvvatlashini bildirgan edi.
“Zamin”ni Telegramʻda oʻqing!
