AQSH Qimmatli qogʻozlar va birjalar komissiyasi (SEC) aʼzosi Hester Peirce kripto sanoatini tokenlashtirilgan aksiyalar savdosiga ruxsat beruvchi "innovatsion imtiyozlar" borasidagi kutilmalarni pasaytirishga chaqirdi. Bloomberg hisobotidan soʻng berilgan ushbu bayonotda, Peirce har qanday imtiyoz koʻlami cheklangan boʻlishini taʼkidladi. Bu haqda Cointelegraph.com xabar beradi.
Peirce xonimning soʻzlariga koʻra, yangi qoidalar faqat investorlar bugungi kunda ikkilamchi bozorda sotib olishi mumkin boʻlgan aksiyalarning raqamli koʻrinishlariga ruxsat berishi koʻzda tutilgan. U sintetik tokenlar ushbu imtiyozga kiritilmasligini, bu esa uchinchi tomonlar uchun aksiya narxini kuzatuvchi tokenlarni taklif qilishni qiyinlashtirishini aytdi.
Hozirda RWA.xyz maʼlumotlariga koʻra, blokcheyn tarmoqlarida 1,48 milliard dollarlik aksiyalar, jumladan Circle, MicroStrategy va Google (GOOG) kabi kompaniyalar qimmatli qogʻozlari tokenlashtirilgan. Citibank va McKinsey & Co kabi moliya institutlari 2030-yilga kelib tokenizatsiya sektori trillion dollarlik bozorga aylanishini bashorat qilgan edi.
Superstate bosh direktori Robert Leshnerning fikricha, bunday qatʼiy yondashuv markazlashmagan moliya (DeFi) va tokenizatsiya sohasini AQSH kapital bozori standartlariga zarar yetkazmagan holda kengaytirishga imkon beradi. Securitize rahbari Carlos Domingo ham bu yondashuv mulkchilikning parchalanish xavfini kamaytirishini taʼkidladi.
SEC hozirda tokenlashtirilgan savdo qoidalarini shakllantirish uchun yuzlab bozor ishtirokchilari bilan maslahatlashmoqda. Hozircha yakuniy tafsilotlar tasdiqlanmagan va imtiyozlar joriy etilgunga qadar oʻzgarishi mumkin.
“Zamin”ni Telegramʻda oʻqing!
