Bitcoin narxi 72,6 ming dollargacha tushishi oqibatida 935 mln dollarlik likvidatsiya yuz berdi
Payshanba kuni erta tongda Osiyo savdo sessiyasida Bitcoin (BTC) narxi keskin pasayib, 72,600 dollargacha tushdi. Bu holat kripto bozoridagi leverajli pozitsiyalarning ommaviy likvidatsiyasiga sabab boʻldi. BTC/USD juftligi 72,620 dollargacha arzonlashib, AQSHning Eronga bergan yangi harbiy zarbalari haqidagi xabarlar fonida 13-apreldan beri toʻplangan barcha oʻsish koʻrsatkichlarini yoʻqotdi. Bu haqda Cointelegraph.com xabar beradi.
Mazkur pasayish boshqa yirik kapitallashuvga ega kriptovalyutalarga ham taʼsir koʻrsatdi va soʻnggi 24 soat ichida kripto bozoridan 80 milliard dollardan ortiq mablagʻ chiqib ketdi. Derivativlar bozori ham jiddiy talofat koʻrdi: 874 million dollardan ortiq long (oʻsishga tikilgan) pozitsiyalar yopildi. Shundan 348,5 million dollari Bitcoin, 228,5 million dollari esa Ether (ETH) hissasiga toʻgʻri keldi.
CoinGlass maʼlumotlariga koʻra, bozor boʻylab jami 935,6 million dollarlik short va long pozitsiyalar likvidatsiya qilingan. Eng yirik yakka tartibdagi likvidatsiya Hyperliquid birjasida qayd etilib, unda 15,34 million dollarlik BTC-USD long pozitsiyasi majburiy yopilgan. Shuningdek, barcha birjalarda Bitcoin fyucherslari boʻyicha ochiq qiziqish (Open Interest) koʻrsatkichi ham pasaygan.
Xususan, Chicago Mercantile Exchange va BingX birjalarida Bitcoin OI koʻrsatkichi mos ravishda 9,8% va 9% ga kamaydi. Ochiq qiziqishning pasayishi bozorda leveraj va ishtirokchilar faolligi kamayganini anglatadi, bu esa koʻpincha "ayiq" (bearish) kayfiyatidan dalolat beradi. Masalan, yanvar va fevral oylaridagi shunday pasayish BTC narxining 38% ga tushishi bilan kuzatilgan edi.
Shu bilan birga, AQSHdagi spot ETF fondlaridan mablagʻlarning chiqib ketishi davom etmoqda, bu esa institutsional investorlar qiziqishi susayganini koʻrsatadi. Ushbu ETFlar ketma-ket sakkiz kun davomida jami 2,6 milliard dollar yoʻqotdi. Chorshanba kuni qayd etilgan 733 million dollarlik sof chiqib ketish 29-yanvardan beri eng yuqori koʻrsatkich boʻldi.
“Zamin”ni Telegramʻda oʻqing!
