Bitcoin (BTC) bozori oʻzining klassik narx koʻrsatkichlaridan biri bilan xayrlashmoqda, chunki grafiklardagi anʼanaviy xususiyat butunlay yoʻqoladi. Shu jumadan boshlab CME Group’ning Bitcoin fyuchers bozori haftasiga yetti kun, sutkasiga 24 soat davomida ishlay boshlaydi. Bu esa fyucherslardagi mashhur “gap” (boʻshliq) fenomeniga chek qoʻyadi. Bu haqda Cointelegraph.com xabar beradi.
24 soatlik savdo tartibiga oʻtish haqida fevral oyida eʼlon qilingan edi. CME’ning aksiyalar va muqobil mahsulotlar boʻyicha global rahbari Tim McCourtning taʼkidlashicha, raqamli aktivlar bozorida risklarni boshqarishga boʻlgan talab rekord darajaga yetgan. 2025-yilda kriptovalyuta fyucherslari va opsionlari boʻyicha nominal hajm 3 trillion dollardan oshib ketdi.
Ushbu oʻzgarish natijasida dam olish kunlari fyuchers savdolari toʻxtamaydi, bu esa bir savdo haftasining yakuni va keyingisining boshlanishi oʻrtasidagi tafovutlarni bartaraf etadi. Ilgari BTC/USD juftligi yangi hafta boshlanganda ushbu boʻshliqlarni “toʻldirish” uchun yuqoriga yoki pastga harakat qilar edi. Baʼzi boʻshliqlar oylab yopilmay qolib ketishi ham kuzatilgan.
Taniqli treyder Daan Crypto Trades hozirda narx atrofida uchta boʻshliq qolganini qayd etdi. Uning soʻzlariga koʻra, oʻtgan haftadagi CME boʻshligʻi yopilgan va hozirda bozor qolgan bir necha “gap”lar orasidagi katta hududda savdo qilmoqda.
Hozircha eng pastdagi ochiq qolgan boʻshliq 67,000 USD darajasidan biroz yuqoriroqda joylashgan boʻlib, bu daraja oxirgi marta aprel oyi boshida kuzatilgan edi. Shu bilan birga, tahlilchilar Bitfinex birjasidagi oʻzgaruvchan tendensiyalarni ham diqqat bilan kuzatib borishmoqda.
“Zamin”ni Telegramʻda oʻqing!
