O‘zbekistonga 11 yildan so‘ng barter qaytdi — hukumatlararo bitimlar doirasida

^{Foto: iStock}
O‘zbekistonda hukumatlararo bitimlar doirasida eksport-import operatsiyalarini barter asosida amalga oshirishga ruxsat berildi. Bu prezident farmoni bilan tasdiqlangan. Hujjatda qayd etilishicha, bunday operatsiyalar Vazirlar Mahkamasi qarorlariga ko‘ra amalga oshirilishi mumkin.

Barter O‘zbekistonda 1993 yilda cheklangan, 2011 yilda esa butunlay taqiqlangan edi

Barter — pul ishlatmasdan sotib olish va sotish operatsiyalari. 1993 yilda O‘zbekistonda barter cheklangan edi. Bu barter asosida yetkazib berilayotgan va xarid qilinayotgan tovarlarning qiymat jihatdan tengligi qo‘pol ravishda buzilayotganligi bilan izohlangan edi.

- Ko‘pgina hollarda O‘zbekistondan yetkazib berilayotgan strategik mahsulot va xom ashyo: paxta tolasi, rangli metallar, azot va fosfat o‘g‘itlarining narxi yashirincha arzonlashtirilganligi hisobiga respublikaga gilamlar, sigaretalar, spirtli ichimliklar va shu singari mollar oshirilgan narxda olib kelinmoqda, — deyilgan edi 1993 yilgi farmonda.

Shu munosabat bilan barter — neft, qurilish va yog‘och mahsulotlaridan tashqari — taqiqlangan edi. 2011 yilda bu istisno ham bekor qilindi.

Barterning joriy qaytarilishi 2022 yilning yanvarida Turkmaniston bilan ikkita shartnoma tuzilgani bilan bog‘liq. “Zamin”ni Telegramʻda oʻqing!