«Tomorqa ipotekasini joriy qilish kerak. Tomorqa ipotekasi bu xalq ipotekasi bo‘ladi» — Shavkat Mirziyoyev

^{Foto: Prezident matbuot xizmati}
Shavkat Mirziyoyev 10 avgust kuni Toshkent shahrining Yashnobod tumanida tashkil etilgan ipoteka markazini borib ko‘rdi. Bu haqda Prezident matbuot xizmati xabar qildi.

Qayd etilishicha, joriy yilda ipoteka kreditlari uchun tijorat banklariga budjetdan 13 trillion so‘m ajratilishi ko‘zda tutilgan. Lekin olti oyda aholiga bu mablag‘larning 30 foizi berilgan, xolos.

Shu bois prezident 6 iyul kuni o‘tkazilgan videoselektor yig‘ilishida bu borada byurokratiyani kamaytirish, aholiga kompleks xizmat ko‘rsatadigan ipoteka markazlari tashkil qilish zarurligini aytgan.

^{Foto: Prezident matbuot xizmati}
Birinchi shunday markaz Toshkent shahrida ish boshladi. Bu yerda ipoteka bozoridagi takliflar umumlashgan va shaffof tizim yo‘lga qo‘yilgan. Tashrif buyuruvchilarga Toshkent shahrida qurilayotgan uylar, ularga xizmat ko‘rsatadigan banklar, ipoteka kreditlari shartlari haqida batafsil ma’lumotlar beriladi. Oldi-sotdi, garov va ipoteka krediti shartnomalarini rasmiylashtirish tartibi, uy-joyga bo‘lgan huquqni davlat ro‘yxatidan o‘tkazish masalalarida ham yordam beriladi. Eng muhimi, barcha xizmatlar bir joyda ko‘rsatiladi.

«Xalq turmushini yaxshilash uchun qancha qarorlar chiqyapti, qulayliklar yaratilyapti. Lekin ko‘pchilik bundan to‘la xabardor emas. Bilganlar ham qayerga borishni bilmay, ovora bo‘ladi. Bu markaz uy olishni istaganlarga kompleks xizmat ko‘rsatib, og‘irini yengil qiladi. Endi markazning elektron platformalarini rivojlantirib, odamlarga yanada qulaylik yaratish kerak», – dedi Shavkat Mirziyoyev.

^{Foto: Prezident matbuot xizmati}
Davlat rahbari minglab odamlar tomorqa uchun ipotekadan foydalana olmayotganiga e’tibor qaratib, mutasaddilarga bu bo‘yicha ko‘rsatmalar berdi.

«Tomorqa ipotekasini joriy qilish kerak. Tomorqa ipotekasi bu xalq ipotekasi bo‘ladi», – dedi prezident.

Markazda qurilish va developer kompaniyalar o‘z ofislarini tashkil etgan. Xaridorlar uchun barcha sharoitlar yaratilgan. “Zamin” yangiliklarini “Twitter”da kuzatib boring