“Adliya xalq orasida” festivali o‘tkazildi

Joriy yil 29 avgust kuni Adliya vazirligi tomonidan mustaqillikning 31 yilligiga bag‘ishlab “Yangi O‘zbekistonda el aziz, inson aziz”shiori ostida aholining huquqiy ongi va huquqiy madaniyatini yuksaltirishga hamda qonuniylikni mustahkamlashga bag‘ishlangan “Adliya xalq orasida” nomli huquqiy festival ilk marotaba o‘tkazildi.

Toshkent markaziy Eko bog‘ida tashkil etilgan ushbu tadbirda Adliya vazirligi mas’ullari, adliya organlari xodimlari, Ommaviy axborot vositalari vakillari hamda ko‘plab fuqarolar ishtirok etishdi.

Adliya vazirligi mas’uli festivalni kirish so‘zi bilan ochib berdi. Shundan so‘ng tadbirning asosiy qismi boshlandi. “Yoshlar” radiokanali hamda “Oriat dono” radiokanali ijodkorlari bilan hamkorlikda qiziqarli o‘yin va viktorinalar tashkil etildi.

Jumladan, “Yoshlar” radiokanali boshlovchilari tomonidan o‘tkazilgan viktorinada fuqarolar turli vaziyatlarda qanday harakat qilish kerakligi, muammoli vaziyatlarga qanday huquqiy yechim topish bo‘yicha turli kazuslarga javob berishdi. Ushbu shartda ko‘plab fuqarolar ishtirok etib, o‘z bilimlari va hayotiy tajribalarini sinab ko‘rishdi. Faol ishtirokchilar esdalik sovg‘alariga ega bo‘lishdi.

Shuningdek, “Oriat dono” radiosida doimiy o‘tkaziladigan “Tavakkal” dasturi bugun ushbu tadbir orqali yurtdoshlarimiz ko‘z o‘ngida jonli ravishda tashkil qilindi. Unda ishtirokchilarga mehnat qonunchiligi, ishsizlik, ta’lim, sog‘liqni-saqlash, fuqarolik va mamlakatning har bir fuqarosi bilishi lozim bo‘lgan boshqa huquqlar va majburiyatlarga oid qiziqarli savollar berildi. Ishtirokchilar savollarga “To‘g‘ri” yoki “Noto‘g‘ri” deb javob berishdi. Viktorinada faol ishtirok etgan fuqarolar vazirlikning esdalik sovg‘alari bilan taqdirlandi.

Festival “Eko bog‘”ga hordiq olish maqsadida kelgan fuqarolar uchun chinakam bayramga aylandi. Tadbirga taklif etilgan estrada xonandalari ijrosidagi kuy-qo‘shiqlar yig‘ilganlarga ko‘tarinki kayfiyat bag‘ishladi. Eng asosiysi yurtdoshlarimiz o‘zlarining huquqiy bilim darajalarini sinovdan o‘tkazishdi.


Festivalda “Huquqiy maslahat” aksiyasi doirasida Toshkent shahar adliya boshqarmasi xodimlari, notariuslar, advokatlar hamda yuridik xizmat ko‘rsatish markazlari, FHDYO va davlat xizmatlari markazlari, “Madad” NNT xodimlari tomonidan fuqarolarga bepul huquqiy maslahatlar berildi.


Shuningdek, tadbir davomida “Adolat” milliy huquqiy axborot markazi tomonidan nashr etilgan kitoblar va nogironligi bo‘lgan shaxslar tomonidan yaratilgan mahsulotlar yarmarkasi tashkil etildi.

“Zamin” yangiliklarini “Vkontakti”da kuzatib boring