2023-yilning birinchi yarim yilligi yakunlariga ko‘ra, O‘zbekiston ko‘chmas mulk bozori 3,9 foizga o‘sdi. Bu haqda Iqtisodiy tadqiqotlar va islohotlar markazi xabar berdi.
Yarimyillik yakunlariga ko‘ra, ko‘chmas mulk oldi-sotdisi bo‘yicha bitimlar soni deyarli 131 mingtani tashkil etib, yillik o‘sish 3,9 foizga oshgan. Ayniqsa, 2-chorakda sotuvlar 5 foizga o‘sgan va 69 ming bitimdan oshgan.
Iyun oyida ko‘chmas mulk bozori faollikning pasayishi bilan ajralib turadi. Xususan, oylik sotuvlar may oyida sezilarli o‘sishdan keyin 7,7 foizga kamaygan. Ko‘chmas mulk bo‘lgan turar-joy oldi-sotdi shartnomalari soni may oyidagi 25,5 mingtaga nisbatan 23,6 mingtani tashkil etgan.
Shu bilan birga, yil boshida ijara haqining 20 foizdan ortiq pasayishi bir vaqtning o‘zida poytaxtning uchta hududida qayd etilgan:
- Olmazorda — 26 foiz;
- Shayxontohurda — 24 foiz;
- Bektemirda — 22 foiz.
Iyun oyida ikkilamchi ko‘chmas mulk bozorida uy-joy narxining o‘sish sur’ati sekinlashgan. Agar may oyida 1 kvadrat/metr uchun uy-joy o‘rtacha narxining oshishi 2,5 foizni tashkil etgan bo‘lsa, iyun oyida “ikkilamchi uy-joy” narxi atigi 0,8 foizga oshgan.
Joriy davrni o‘tgan yilning shu davri bilan solishtirganda, ikkilamchi ko‘chmas mulkning o‘rtacha narxi 22 foizdan oshgan. Namangan (34,9 foiz), Toshkent (29,4 foiz) viloyatlarida va Toshkent shahrida (30,4 foiz) uy-joy narxining sezilarli o‘sishi qayd etilgan.
“Zamin” yangiliklarini “Odnoklassniki”da kuzatib boring
