17:46 / 04.08.2016
9 505

Nukus temir yo‘l vokzali zamonaviy ko‘rinishda rekonstruksiya qilindi

Nukus temir yo‘l vokzali zamonaviy ko‘rinishda rekonstruksiya qilindi
Mustaqillik yillarida Nukus shahrida barpo etilgan muhtasham va salobatli binolar, madaniy-maishiy va sanoat inshootlari, zamonaviy me’moriy andozalardagi ko‘p qavatli turar joylar shahar ko‘rkiga ko‘rk qo‘shmoqda.

Ana shunday muhim inshootlardan biri – Nukus temir yo‘l vokzalida 5,5 milliard so‘mlik rekonstruksiya va obodonlashtirish ishlari amalga oshirilib, foydalanishga topshirildi, deb xabar bermoqda “O‘za”.

Shu munosabat bilan o‘tkazilgan tadbirda Prezidentimiz rahnamoligida amalga oshirilayotgan keng ko‘lamli bunyodkorlik ishlari tufayli maishiy va xizmat ko‘rsatish ob’ektlari, servis shoxobchalari faoliyati yo‘lga qo‘yilayotgani aholining turmush farovonligi yuksalishiga xizmat qilayotgani ta’kidlandi.

Zamonaviy me’moriy andozalarga mos tarzda qayta bunyod etilgan vokzal binosida bir vaqtning o‘zida 400 yo‘lovchiga, bir kecha-kunduzda esa 1 ming 800 yo‘lovchiga xizmat ko‘rsatish imkoniyati yaratildi. Yo‘lovchilarni kutib olish va kuzatib qo‘yish uchun 6 yo‘lak barcha qulaylikka ega bo‘ldi.

Yo‘lovchilar uchun VIP kutish zallari, ona va bola xonasi, tibbiyot punkti, mehmonxona tipidagi dam olish xonalari, savdo shoxobchalari qurildi. Poezdlar yo‘nalishi va qatnovi to‘g‘risida axborot beradigan elektron ma’lumotlar tablosi o‘rnatildi. 1,4 gektar maydonni egallagan vokzal hududida keng ko‘lamli obodonlashtirish ishlari olib borildi. Gulga burkangan yam-yashil xiyobon o‘rtasida zamonaviy favvora qurilib, yo‘lovchilarning hordiq chiqarishlari uchun qulaylik yaratildi. 550 metrlik ikki perronga zamonaviy plitalar to‘shaldi.

Vatanimiz mustaqilligining 25 yillik bayramini munosib kutib olishga qizg‘in hozirlik ko‘rilayotgan Qoraqalpog‘iston Respublikasida joriy yilda barcha moliyaviy manbalar hisobidan 4 trillion 52 milliard so‘mlik investisiya o‘zlashtirilib, qator iqtisodiy-ijtimoiy loyihalar amalga oshirilmoqda.

Ctrl
Enter
Xato topdIngizmi?
Iborani ajratib Ctrl+Enter tugmasini bosing
Fikrlar (0)


Yangiliklar » Jamiyat » Nukus temir yo‘l vokzali zamonaviy ko‘rinishda rekonstruksiya qilindi