Toshkentda elektrobus muzlama sabab yo‘l chetidagi ustunga borib urildi

^{Foto: Ijtimoiy tarmoqlar}

Joriy yilning 14 dekabr kuni soat 09:15 larda «18-Avtobus saroyi» filiali tasarrufidagi Yutong rusumli, 53-sonli yo‘nalishda harakatlanayotgan haydovchi A.A (staji 7 yil) boshqaruvidagi elektrobus ishtirokida YTH qayd etildi.

«Toshshahartransxizmat» xabariga ko‘ra, u Uchtepa tumani, O‘rikzor mahallasi, Zarafshon ko‘chasi bo‘ylab harakatlanib borayotgan vaqtda, yo‘ldagi muzlama sababli boshqaruvni yo‘qotib yo‘l chetidagi ustunga borib urilgan.

Mazkur yo‘l-transport hodisasi natijasida tan jarohati olganlar yo‘q. Yutong rusumli elektrobus texnik shikastlangan.

Hozirda ushbu yo‘l-transport hodisasi Toshkent shahar IIBB YHXB xodimlari tomonidan rasmiylashtirilib, surishtiruv ishlari olib borilyapti.

Шухрат Раззаков

«ZAMIN.UZ» muharriri