Moskvada lift qulashi oqibatida 5 kishi halok bo‘ldi

23 sentyabrda Moskvada qurilayotgan "Serdse stolisы" ("Poytaxti yuragi") turar joy majmuasida liftning qulashi 5 kishining halok bo‘lishiga olib keldi. Tergovchilar xavfsizlik qoidalari buzilishi bo‘yicha jinoiy ish qo‘zg‘atishgan. Rostexnadzor yuz bergan voqea sabablarini tergov qilish bo‘yicha komissiya tuzishni rejalashtirmoqda. Hozircha liftning qulashiga trosning uzilishi sabab bo‘lgani aytilmoqda.

Lift qulashi oqibatida 5 quruvchi halok bo‘ldi. Gap nafaqat odamlarni, balki yuklarni tashishga mo‘ljallangan lift haqida bormoqda. Fojia "Donstroy" kompaniyasi tomonidan qurilayotgan ob’ektda yuz bergan.

"23 sentyabrda Moskvaning Shenogina ko‘chasidagi turar joy binolaridan birida 12-19 qavatdan liftning qulashi yuz berdi, oqibatda lift ichida bo‘lgan 5 erkak halok bo‘lgan. Bu holat bo‘yicha qurilish ishlarini o‘tkazishda xavfsizlik qoidalarining buzilishi moddasi bo‘yicha jinoiy ish qo‘zg‘atilgan", deb ma’lum qildi Rossiya Tergov qo‘mitasining Moskva bo‘yicha bosh tergov boshqarmasi boshlig‘i katta yordamchisi Yuliya Ivanova.

Ta’kidlanishicha, tergovchilar qurilish ob’ekti va ishlarning o‘tkazilishi, liftning o‘rnatilishi va undan foydalanishga doir hujjatlarni musodara qilishmoqda. Liftning qulashi va avariyaviy vaziyatlarda straxovkalash tizimining ishlamagani sabablari aniqlashtirilmoqda.

Manba: Kun.uz “Zamin” yangiliklarini “Telegram”da kuzatib boring