«Tolibon» Oʻzbekistondan «Termiz» chegara bozorida musiqa qoʻymaslikni soʻradi

^{Foto: independentpersian.com}
Afgʻonistonning «Tolibon» hukumati vakillari Oʻzbekistondan «Termiz» chegara bozorida kontsert va musiqa dasturlarini bekor qilishni soʻradi. Aks holda Afgʻoniston fuqarolari umumiy bozorga kiritilmaydi, deb xabar berdi Atlas Press.

«Termiz» chegara bozori yaqinda Oʻzbekiston-Afgʻoniston chegarasida ochilgan edi va Afgʻoniston fuqarolari unga 15 kungacha vizasiz kirishi mumkin.

Nashr manbalariga koʻra, toliblar bu bozorda kontsert va musiqa dasturlari oʻtkazishga qarshi ekanligini, Oʻzbekiston hukumatidan bunday dasturlarni oʻtkazishga yoʻl qoʻymaslikni soʻragan. Qayd qilinishicha, avval bozorga kelganlar uchun musiqa dasturlari uyushtirilgan, oʻzbek san'atkorlari kontsert bergan.

«Tolibon» bozordagi kontsertlarni taqiqlashni talab etgan va musiqa dasturlari davom etsa, Afgʻoniston fuqarolarini bozorga kiritmasligi haqida ogohlantirgan.

Ta'kidlanishicha, «Tolibon» va Oʻzbekiston vakillari bu borada rasman hech qanday ma'lumot bermagan. Oʻzbekiston «Tolibon»ning bu talabini bajarishi yoki yoʻqligi ham noma'lum.

Nashrning qayd qilishicha, «Tolibon» oʻzining ziddiyatli qonunini Afgʻonistondan tashqarida ham amalga oshirishga intilayotgan koʻrinadi. Yangi e'lon qilingan ushbu qonun musiqa chalish va tinglashni taqiqlashdan tashqari, afgʻon fuqarolari, ayniqsa ayollar uchun boshqa jiddiy cheklovlarni ham qoʻyadi. “Zamin” yangiliklarini “Telegram”da kuzatib boring