Fargʻonada Damas'ni boshqargan voyaga etmagan bola BYD bilan toʻqnashdi (video)

^{Foto: Telegram}
Fargʻona viloyati Oltiariq tumanida Damas va BYD Song EV toʻqnashishi oqibatida voyaga etmagan bola vafot etdi. YTH videosi ijtimoiy tarmoqlarda tarqaldi.

Viloyat Yoʻl harakati xavfsizligi boshqarmasining ma'lum qilishicha, 30 yanvar kuni oʻtkazilayotgan reyd tadbiri davomida, 2004 yilda tugʻilgan fuqaro M.Gʻ. amakisi Yo.Gʻ.ga tegishli BYD Song EV rusumli avtomobilini tegishli hujjatlarsiz boshqargani uchun ma'muriy bayonnoma rasmiylashtirilib, YPX inspektori, safdor R.Q. tomonidan jarima maydonchasiga olib ketilayotganda, 2007 yilda tugʻilgan voyaga etmagan X.N. ustozi A.S.ga tegishli (ustozi A.S. voyaga etmagan X.N.ning haydovchilik guvohnomasi yoʻqligini bila turib, avtomobilni unga bergan) Damas avtomobilini haydovchilik guvohnomasisiz boshqarib, “Qapchugʻay” mahallasida ikkinchi darajali yoʻldan asosiy yoʻlga yoʻl qoidasiga rioya qilmasdan chiqishi natijasida mazkur YTH sodir boʻlgan.

Oqibatda Damas’ni boshqargan bola X.N. tan jarohati olib, koʻrsatilgan tibbiy muolajalarga qaramasdan shifoxonada vafot etgan.

Videoda Damas qoidani qoʻpol tarzda buzib yoʻlga chiqqanini, shuningdek YPX xodimi boshqaruvidagi BYD esa 84 km/soat tezlikda kelib urilganini koʻrish mumkin.

Holat yuzasidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qoʻzgʻatildi. Hozirda tergov harakatlari olib borilmoqda. “Zamin” yangiliklarini “Telegram”da kuzatib boring