Xorazmda uyga asteroid tushgani haqidagi xabar rad etildi: hodisaning haqiqiy sababi nimada?

Ijtimoiy tarmoqlarda Xorazm viloyatining Bog‘ot tumanidagi uylardan biriga osmondan tushgan jism, ehtimol, asteroid sabab bo‘lgan bo‘lishi mumkinligi haqidagi video keng tarqaldi. Videolavhada hodisadan avval kuchli zarba ovozi eshitilgani, natijada uyning kirish qismi, ya’ni dahlizining shifti qulab tushib, teshilgani aniq ko‘rinadi.

Biroq Xorazm viloyati Favqulodda vaziyatlar boshqarmasi bu xabarlarni rasman rad etdi. Boshqarma ma’lumotiga ko‘ra, voqea 12 may kuni soat 3:39 da Bog‘ot tumani Yuksalish mahallasida sodir bo‘lgan. Uyning dahlizidagi taxminan 10 kv metrlik tom qismi qulaganligi haqida xabar tushgan va zudlik bilan voqea joyiga Ichki ishlar boshqarmasi hamda Favqulodda vaziyatlar boshqarmasining maxsus laboratoriya xizmatlari yetib borib, tekshiruv o‘tkazganlar.

O‘rganish ishlari natijasida hodisa joyida hech qanday fazo jismlari yoki portlovchi moddalarning qoldiqlari topilmagan. Shu bilan birga, xonadonda ikki dona propan gaz balloni mavjudligi ham aniqlangan. Bundan tashqari, dastlabki tekshiruv xulosalariga ko‘ra, uyda propan gaz ballonidan gaz sizib chiqishi va to‘planishi sababli chaqnash sodir bo‘lgan bo‘lishi mumkinligi aytilmoqda.

Favqulodda vaziyatlar vazirligi matbuot xizmatining bergan ma’lumotga ko‘ra, hozirda voqeaning aniq sabablarini aniqlash uchun maxsus ekspertiza tayinlangan. Vazirlik vakili, portlash turiga ko‘ra gazning sizib chiqib, xonaga to‘plangani va chaqnash natijasida shiftining yuqoriga qarab parchalangan bo‘lishi mumkinligini ta’kidladi.

Hodisa paytida uy egalari tashqarida uxlab yotganligi sababli tan jarohati olganlar yoki jabrlanganlar yo‘qligi xabar qilingan.

Shunday qilib, rasmiylar va mutaxassislar ushbu holatning asteroid yoki boshqa fazoviy obyekt bilan bog‘liq emasligini, balki uydagi gaz balloni bilan bog‘liq xavfsizlik talablariga amal qilinmaganligi ehtimoli borligini urg‘ulashmoqda. Bu holat yana bir bor aholiga gaz jihozlaridan foydalanishda maksimal darajada ehtiyotkor bo‘lish va xavfsizlik qoidalariga qat’iy amal qilish lozimligini eslatib o‘tdi. “Zamin”ni Telegramʻda oʻqing!