So‘nggi qo‘ng‘iroq taqiqlanmadi – rasmiy bayonot

Maktabgacha va maktab ta’limi vazirligi ijtimoiy tarmoqlarda tarqalayotgan “So‘nggi qo‘ng‘iroq” tadbirlari taqiqlangani haqidagi xabarlarga munosabat bildirdi. Rasmiy ma’lumotga ko‘ra, bu xabarlar haqiqatga to‘g‘ri kelmaydi va noto‘g‘ri talqin qilinmoqda.

Sanaga aniqlik kiritildi

Vazirlik ta’kidlashicha, 2023/2024 o‘quv yili 25 may, yakshanba kuni yakunlanishi kutilmoqda. Ushbu sana dam olish kuniga to‘g‘ri kelgani sababli “So‘nggi qo‘ng‘iroq” tadbirlari 24 may, shanba kuni o‘tkazilishi belgilangan.

“So‘nggi qo‘ng‘iroq maktablarimizda har yilgi an’anaga muvofiq ko‘tarinki ruhda, tantanali tarzda o‘tkaziladi”, — deyiladi vazirlik axborotida.

Har qanday cheklovlar rad etildi

Ayrim Telegram kanallarida tadbirlarga cheklov qo‘yilgani, hatto vals tushish taqiqlangani haqidagi xabarlar ham tarqalgan edi. Bu masalaga ham izoh berildi.

Vazirlik matbuot xizmati “Daryo” nashriga bergan ma’lumotda qayd etilishicha, vals raqsini taqiqlash borasida hech qanday rasmiy hujjat qabul qilinmagan. Ammo ayrim ota-onalar farzandlarining darsdan keyin raqsga tayyorgarlik ko‘rishi, tadbir uchun qimmat liboslar tiktirilishi va bu maqsadda pul yig‘ish kabi holatlardan norozi bo‘layotgani ta’kidlangan.

Vazirlikdan xavfsizlik tavsiyalari

Shu bilan birga, vazirlik maktab jamoalari, o‘quvchilar va ota-onalarni “So‘nggi qo‘ng‘iroq” tadbirlari paytida xavfsizlik qoidalariga rioya qilishga chaqiradi.

Zamin.uz tahririyatidan:
O‘quv yilining yakunlanishi munosabati bilan maktablarda o‘tkaziladigan “So‘nggi qo‘ng‘iroq” tadbirlari – bitiruvchilar uchun unutilmas xotiralardan biri hisoblanadi. Ularni ma’naviy mazmun va xavfsiz muhitda o‘tkazish esa barchamizning mas’uliyatimizdir. “Zamin”ni Telegramʻda oʻqing!