Komilov: O‘zbekiston bir paytlar qo‘shnilar bilan harbiy to‘qnashuvga yaqin bo‘lgan

Sobiq tashqi ishlar vaziri, hozirda prezidentning tashqi siyosat bo‘yicha maxsus vakili Abdulaziz Komilov tarixiy ahamiyatga ega bo‘lgan muhim bayonot bilan chiqdi. Uning ta’kidlashicha, 2016–2017 yillarda O‘zbekiston qo‘shni davlatlar bilan munosabatlarda jiddiy tanglikka duch kelgan va hatto harbiy to‘qnashuv xavfi ham mavjud bo‘lgan.

"Ishonch.uz" nashriga bergan intervyusida Komilov vaziyat qanchalik jiddiy darajaga borganini shunday ifodaladi:

“O‘shanda munosabatlar shunchalik keskinlashgandiki, vaziyat asta-sekin yemirilib, harbiy mojaro chegarasiga yaqinlashgan edi. Agar yangi siyosiy rahbarlikning qat’iy va oqilona pozitsiyasi bo‘lmaganida, murakkab oqibatlar yuzaga kelishi ehtimoldan yiroq emasdi,” – dedi u.

2016 yilda davlat rahbariyatida yuz bergan o‘zgarishdan so‘ng, yangi prezident Shavkat Mirziyoyev Markaziy Osiyoni tashqi siyosatdagi ustuvor yo‘nalish sifatida belgiladi. Komilovning fikricha, aynan shu qaror mintaqadagi vaziyatni to‘g‘ri yo‘lga yo‘naltirdi.

“Prezidentimiz o‘zining ilk nutqlaridanoq Markaziy Osiyo davlatlari bilan yaqin aloqalar o‘rnatishni, yig‘ilib qolgan muammolarni bartaraf etishni asosiy maqsad qilib belgiladilar. 2017 yili BMT minbaridan turib ham bu yo‘nalishni ochiq e’lon qildilar,” – deya qo‘shimcha qildi Komilov.

Shuningdek, u mintaqadagi integratsiya jarayonlari va davlat rahbarlari o‘rtasidagi maslahatlashuv uchrashuvlari orqali hozirgi barqaror va konstruktiv muloqotga zamin yaratilganini alohida ta’kidladi.

Abdulaziz Komilov 2012 yildan 2022 yilgacha O‘zbekiston tashqi ishlar vaziri lavozimida ishlagan. Keyinroq u prezident huzuridagi Xavfsizlik kengashi kotibi o‘rinbosari etib tayinlandi. 2024 va 2025 yillarda esa u Turkmaniston va Italiya davlatlari tomonidan xalqaro hamkorlikni rivojlantirishdagi hissasi uchun yuqori mukofotlar bilan taqdirlandi.

Bu bayonot nafaqat siyosiy doirada, balki jamoatchilik orasida ham katta qiziqish uyg‘otmoqda. Chunki u so‘nggi yillardagi diplomatik burilish va tinchlikni ta’minlashga qaratilgan harakatlarning qiymatini yanada yorqin namoyon etadi.