Haydovchilik guvohnomasisiz haydalgan Tracker kanalda: Urganchda dahshatli avariya yuz berdi

Xorazm viloyatining Urganch shahrida yosh yigit boshqaruvidagi Chevrolet Tracker avtomobili og‘ir yo‘l-transport hodisasiga uchradi. Bu haqda Kun.uz sayti mahalliy manbasiga tayangan holda xabar tarqatdi.

Ma’lum qilinishicha, mudhish hodisa shu yilning 30 may sanasida sodir bo‘lgan. 2006 yilda tug‘ilgan haydovchi o‘zining tengdosh do‘stlarini avtomobilga mindirib, katta tezlikda harakatlanayotgan paytda boshqaruvni yo‘qotgan. Natijada Tracker mashinasi yo‘l chetidagi kanalga qulab tushgan. Hodisa sodir bo‘lgan vaqtda kanalda suv bo‘lmaganligi vaziyatning yanada og‘irlashuvini oldini olgan bo‘lishi mumkin.

Afsuski, yo‘l-transport hodisasi natijasida mashina ichida bo‘lgan ikki nafar yigit jiddiy tan jarohatlari olib, tez tibbiy yordam orqali shifoxonaga yetkazilgan.

Halokatga uchragan yo‘lovchilardan birining onasi Kun.uz saytiga murojaat qilib, hodisa bilan bog‘liq vaziyatga oydinlik kiritishni so‘ramoqda. Uning aytishicha, avtomobil boshqaruvida bo‘lgan yosh yigitning haydovchilik guvohnomasi mavjud bo‘lmagan. U mashinani yaqinda sotib olgan va uni o‘z nomiga rasmiylashtirishga ulgurmagan.

“O‘g‘lim mashinada old o‘rindiqda yo‘lovchi sifatida o‘tirgan. Avariya paytida u mashinadan tashqariga otilib ketgan va og‘ir jarohatlangan. Hozir o‘g‘lim bilan ovora bo‘lib turgan paytimda ayrimlar uning mashina boshqaruvida bo‘lgani haqida yolg‘on va tuhmat tarqatmoqda. Bu yolg‘on axborotni rad etishlarini talab qilaman”, – deb ta’kidlamoqda jabrlangan yigitning onasi.

Hozirda mazkur voqea yuzasidan huquqni muhofaza qilish organlari tomonidan dastlabki tergov harakatlari olib borilmoqda. Mashinani kim boshqarganligi va voqeaning boshqa tafsilotlari sud-tibbiy va texnik ekspertizalarning yakuniy xulosalari bilan oydinlashadi.

Shu bilan birga, bu fojiali holat yana bir bor haydovchilik guvohnomasisiz transport vositasini boshqarish qanday og‘ir oqibatlarga olib kelishi mumkinligini ko‘rsatadi. Yo‘l harakati xavfsizligi qoidalariga qat’iy rioya qilish har bir yo‘lovchi va haydovchining mas’uliyatida ekanini unutmasligimiz kerak. “Zamin”ni Telegramʻda oʻqing!