Surxondaryoda yana bir qalbni titratuvchi va jamiyatni o‘ylantiruvchi yo‘l-transport halokati sodir bo‘ldi. 3 iyul kuni Oltinsoy tumanida Gentra rusumli avtomobil ishtirokida sodir bo‘lgan halokatda to‘rt nafar o‘smir hayotdan ko‘z yumdi. Bu haqda hududiy YHXB rasmiy manbalari ma’lum qildi.
Ma’lum qilinishicha, mashina rulda haydovchilik guvohnomasiga ega bo‘lmagan 2006 yilda tug‘ilgan o‘smir bo‘lgan. U sinfdosh qizlarini mashinaga o‘tqazib, yo‘lga chiqqan. Afsuski, yo‘l qoidalariga rioya qilinmagani, tezlikni nazorat qilmaslik va tajribaning yo‘qligi og‘ir oqibatlarga olib keldi.
Ishonchli manbalarga ko‘ra, Gentra boshqaruvini yo‘qotgan o‘smir beton to‘siqqa borib urilgan. Mashinada bo‘lgan to‘rt nafar maktab o‘quvchisi — qizlar voqea joyida halok bo‘lgan. Bu fojiali voqea mahalliy aholini larzaga soldi, jamoatchilik esa bu kabi holatlar nega qayta-qayta takrorlanayotgani haqida bosh qotirmoqda.
Haydovchi yosh yigit o‘z tushuntiruvida shunday degan:
“Mashina egasi uni yuvishimni aytgandi. Biz u bilan otmoqchi emasdik, bir oz aylanib kelamiz, deb chiqdik. Haydayotganimda shina portladi, rul bir zumda o‘ngga burildi. Nima bo‘lganini aniq eslay olmayman. Ko‘zimni ochsam, tez yordam mashinasida ekanman.”
Bu so‘zlar ortida hayotning to‘rt bahoridek yosh umri tugaganini his etish — og‘riqli. Sud tibbiy ekspertiza va tergov harakatlari olib borilayotgani ma’lum qilindi. Shuningdek, transport vositasi qonunga zid ravishda boshqarilgani uchun qo‘shimcha yuridik choralar ko‘rilishi kutilmoqda.
Yo‘llarda yurish — bu mas’uliyat. Mashina faqat rul va pedal emas, balki insonlar taqdiri hamdir. Ayniqsa, bu kabi holatlar o‘smirlar orasida keng tarqalayotganini hisobga olsak, jamiyatda oila va maktab tarbiyasining ahamiyati yanada oshadi.
Har bir fojia — katta dars. Bu voqea ota-onalar, ta’lim muassasalari va yo‘l harakati nazoratchilarini yana bir bor og‘ox qilmoqda: farzandlarga ishonish — yaxshi, lekin ularni nazorat qilish — farz.
“Zamin”ni Telegramʻda oʻqing!
