Farg‘ona viloyatida bojxona posti boshlig‘i ushlandi. Bu haqda “Xavfsizlik” kanali xabar berdi. Ma’lumotlarga qaraganda, Farg‘ona viloyatidagi chegara-bojxona postlaridan birining rahbari o‘z xizmat mavqeidan foydalanib, fuqaroning Qirg‘iz Respublikasidan olib kelgan 80 dona “iPhone-16” rusumli uyali telefon apparatlarini tegishli rasmiylashtiruvlarsiz bojxona postidan noqonuniy o‘tkazib berish evaziga 5 000 AQSH dollari hamda 1 dona “iPhone-16 Pro” telefon apparatini talab qilgan.
Davlat xavfsizlik xizmati xodimlari tomonidan o‘tkazilgan tezkor tadbir chog‘ida bojxona organlari podpolkovnigi ushbu moddiy qiymatliklarni qabul qilayotgan vaqtida ashyoviy dalillar bilan qo‘lga olingan (ushlangan). Ya’ni, pul va “iPhone-16 Pro” bilan bog‘liq “aloqalar” vaqtinng o‘zida rasmiy tarzda qayd etilgan.
Hozirda mazkur mansabdor shaxsga nisbatan Jinoyat kodeksining 210-moddasi (pora olish) bilan jinoyat ishi qo‘zg‘atildi va qamoq ehtiyot chorasi qo‘llanildi. Qonunchilikka muvofiq, dalillar kompleks tarzda o‘rganiladi, ayb isbotlangunicha shaxs aybsiz hisoblanadi (aybsizlik prezumpsiyasi).
Zamin.uz taassuroti: bojxona chegarasidagi har bir qaror — qonun va qoidalarga sodiqlik sinovi. Bu holat bo‘yicha surishtiruv yakuni jamoatchilikka ochiq ma’lumotlar orqali oydinlashishi kutilmoqda.
