Fransiyaning O‘zbekistondagi yangi elchisi Valid Fuk faoliyatini boshladi

Fransiyaning O‘zbekistondagi yangi elchisi Valid Fuk 27-avgust kuni rasman o‘z vazifasini bajarishga kirishdi. Bu haqda elchixona matbuot xizmati orqali ma’lum qilindi.

Elchi o‘zbek tilida so‘zlab, ming yillik tarixiy merosi, madaniyati va mehmondo‘stligi bilan mashhur mamlakatimizda ish boshlaganidan mamnunligini bildirdi.

— Sizlar bilan hamkorlik qilish va ikki davlat o‘rtasidagi tarixiy yaqinlikni yanada mustahkamlash uchun barcha kuch-g‘ayratimni safarbar qilaman. Kelgusi oylarda barcha hududlarga tashrif buyurib, Fransiya va O‘zbekistonni bog‘lab turuvchi do‘stlik rishtalarini yanada kuchaytirish niyatim bor, — dedi Valid Fuk.

U o‘z murojaatida ikki davlat o‘rtasidagi hamkorlik yo‘nalishlariga ham e’tibor qaratdi. Jumladan, Fransiya bilan turli loyihalarni amalga oshirish, sayohat va ta’lim sohasida imkoniyatlardan foydalanish, shuningdek, O‘zbekistondagi fransuz muassasalari, xususan, Toshkent va Samarqanddagi Fransuz alyanslari orqali madaniy aloqalarni yanada rivojlantirishga chaqirdi.

Ma’lumot uchun, Valid Fuk Parij Siyosiy tadqiqotlar institutida tahsil olgan. U 2010–2014-yillarda Fransiya Tashqi ishlar vazirligida strategik masalalar, xavfsizlik va qurolsizlanish bo‘yicha boshqarmada ishlagan. Keyinroq Pekindagi elchixonada siyosiy maslahatchi, BMTdagi Fransiya doimiy vakolatxonasida siyosiy maslahatchi sifatida faoliyat yuritgan.

2020–2025-yillar mobaynida esa Fransiya prezidentining Osiyo, Okeaniya va Amerika masalalari bo‘yicha maslahatchisi bo‘lib ishlagan.

Eslatib o‘tamiz, Valid Fuk yangi lavozimda 2021-yildan buyon elchi bo‘lib faoliyat yuritgan Oreliya Bushez o‘rnini egalladi.