O‘zbekistonda aholi iste’mol madaniyatini oshirish va oziq-ovqat mahsulotlaridan oqilona foydalanishga yo‘naltirilgan yangi tashabbus amalga oshirilmoqda. Bu jarayon “Oqilona iste’mol” (Save food) dasturi doirasida belgilab berilgan chora-tadbirlar rejasi asosida yo‘lga qo‘yiladi.
Unga ko‘ra, endilikda mamlakatning yirik savdo markazlari hamda turli xil oziq-ovqat do‘konlarida iste’mol qilish muddati yaqinlashib qolgan mahsulotlar uchun alohida rastalar tashkil etiladi. Bu maxsus bo‘limlardagi tovarlarning narxi har 10 kunda izchil ravishda pasaytirilib boriladi. Shu orqali aholi arzon narxlarda mahsulot sotib olish imkoniyatiga ega bo‘lsa, do‘konlar esa yo‘qotishlarni kamaytira oladi.
Dastur doirasida nafaqat savdo nuqtalarida, balki mahsulotning daladan xaridor qo‘liga yetib kelishigacha bo‘lgan har bir bosqichda yetarlicha nazorat o‘rnatilishi belgilangan. Xususan, yetishtirilgan mahsulotlarni yig‘ib olish, saralab chiqish, tashish, muzlatkich omborlariga joylashtirish va savdo nuqtalariga yetkazish jarayonlari maxsus monitoring ostida bo‘ladi. Bu esa oziq-ovqat mahsulotlarining yo‘l-yo‘lakay yo‘qolishi yoki sifati yomonlashishiga barham berishga xizmat qiladi.
Mas’ul idoralar ta’kidlashicha, bu kabi tashabbus nafaqat aholining kundalik ehtiyojlarini arzon narxlarda qondirish, balki mamlakatdagi oziq-ovqat xavfsizligini ta’minlash va isrofgarchilikka qarshi samarali chora sifatida ham muhim ahamiyat kasb etadi.
Mutaxassislar fikricha, mazkur dasturning samarasi ko‘p jihatdan aholining faol ishtirokiga bog‘liq. Agar xaridorlar muddati tugayotgan mahsulotlarni arzon narxlarda sotib olishni odat qilsa, bu iqtisodiy jihatdan nafaqat ularga, balki butun bozor tizimiga ijobiy ta’sir ko‘rsatadi.
Shu tariqa, “Oqilona iste’mol” dasturi orqali O‘zbekistonda ham iqtisodiy, ham ijtimoiy jihatdan katta ahamiyatga ega bo‘lgan yangi davr boshlanmoqda.
“Zamin”ni Telegramʻda oʻqing!
