Qashqadaryo viloyatida maktab direktori bilan bog‘liq shov-shuvli holat jamoatchilik e’tiborida turibdi. Ijtimoiy tarmoqlarda Ko‘kdala tumanidagi 17-umumta’lim maktabi direktori Azamat Ruzanovga tegishli ekani aytilgan audioyozuv tarqaldi. Unda erkak kishi o‘zini direktor deb tanitgan holda ayol suhbatdoshiga noma’qul taklif bildirgan.
Yozuvda ayol “chizmachilikka bo‘lsayam olsangiz mayli edi”, deganida, erkakning “Gapning dangali-da, sen bilan birga bo‘lishni xohlayman, to‘g‘risini aytsam. Meni tushundingmi?” degan so‘zlari yangraydi. Bu suhbat jamoatchilikda keskin muhokamalarga sabab bo‘ldi.
Qashqadaryo viloyati Maktabgacha va maktab ta’limi boshqarmasi mazkur holat yuzasidan rasmiy bayonot berdi. Bayonotda aytilishicha, holat o‘rganilib, direktorning xatti-harakatlari pedagog maqomiga dog‘ tushiradi, degan xulosaga kelingan.
“Boshqarma boshlig‘ining 2025 yil 16 oktyabrdagi buyrug‘i bilan Azamat Ruzanov maktab direktori vazifasidan ozod etildi. Ta’lim tizimida axloqiy qoidalarni buzish holatlariga nisbatan keskin choralar ko‘riladi,” — deyiladi rasmiy munosabatda.
Ma’lumot uchun, Ruzanov xalq deputatlari Ko‘kdala tuman kengashi deputati ham hisoblanadi. U Naimansaroy mahallasi saylov okrugidan saylangan. Kengash kotibiyatining ma’lum qilishicha, hozirda uning harakati reglament va deputatlik odob-axloq masalalari bo‘yicha komissiyada muhokama qilinishi rejalashtirilgan.
Tahlilchilar ta’kidlashicha, bunday holatlar ta’lim tizimidagi obro‘-e’tiborga salbiy ta’sir ko‘rsatadi va rahbar lavozimidagi shaxslardan yuqori darajadagi mas’uliyat talab etiladi.
Shunday qilib, Ko‘kdaladagi voqea jamoatchilikka yana bir bor rahbarlik odobi, shaxsiy mas’uliyat va davlat xizmatchisi madaniyatining muhimligini eslatdi.
“Zamin”ni Telegramʻda oʻqing!
