Raqobat qo‘mitasiga oxirgi oylarda umumiy ovqatlanish sohasida xizmatlardan norozi bo‘lgan iste’molchilar murojaatlari keskin ortdi. Xususan, ayrim restoran va kafelerda taom narxidan tashqari 10–15 foiz, ba’zan esa hatto 20 foizgacha “xizmat haqi” qo‘shimcha to‘lov sifatida majburiy ravishda undirilayotgani aytilmoqda. Shuningdek, ba’zi muassasalar mijozlardan oldindan depozit puli talab qilayotgani haqida ham shikoyatlar bildirilgan.
Qo‘mita bunday holatlar iste’molchilarning asosiy huquqlarini buzishi mumkinligini ta’kidlamoqda. Amaldagi qonunchilik — “Iste’molchilar huquqlarini himoya qilish to‘g‘risida”gi Qonunning 4-, 19- va 21-moddalariga muvofiq, har bir fuqaro tovar va xizmatlar haqida to‘laqonli ma’lumot olish, ularni erkin tanlash va sifatli xizmat talab qilish huquqiga ega. Ijrochi esa xizmatni belgilangan muddatda, kerakli hajm va sifatda ko‘rsatishi shart. Eng muhimi, sotuvchi yoki xizmat ko‘rsatuvchi xaridorni majburiy qo‘shimcha xaridlarga undash yoki ko‘rsatilmagan xizmatlar uchun haq olishga mutlaqo haqli emas.
Shikoyatlar asosida Raqobat qo‘mitasi jamoat ovqatlanish obyekti egalariga qat’iy tarzda ogohlantiruv yo‘lladi. Unda qayd etilishicha, xaridorni xabardor qilmasdan xizmat haqi undirish — qonunga zid amaliyot. Shu bois direktorlar va tadbirkorlar taom narxlari, xizmat ko‘rsatish tartibi, ofitsiant xizmati uchun haq miqdori kabi barcha shartlar haqida mijozni oldindan aniq va ochiq ma’lumot bilan tanishtirishi shart.
Shuningdek, qo‘mita ayrim ovqatlanish nuqtalarida “o‘z-o‘ziga xizmat qilish” imkoniyatini joriy etish, ortiqcha qo‘shimcha xizmat takliflarini majburiy tarzda o‘tkazmaslik, har bir to‘lovning asosi mijozga tushuntirilishi zarurligini ham ta’kidladi.
Qisqa qilib aytganda, fuqarolardan tushayotgan signallar davlat idoralarini bu sohada yanada qattiqroq nazorat o‘rnatishga majbur qilmoqda. Iste’molchi haqi — ustuvor va mijoz manfaatiga zid bo‘lgan har bir amaliyotga javobgarlik belgilanishi mumkin.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
