O‘zbekiston Davlat xavfsizlik xizmati chet el maxsus xizmatlari bilan uyg‘un hamkorlikda o‘tkazgan uzoq muddatli va murakkab tezkor tadbirlar natijasida, o‘ta xavfli deb baholangan, xalqaro terroristik tuzilmalar bilan bog‘liq shaxs nihoyat mamlakatga qaytarildi. Bu fuqaro qariyb chorak asr – 25 yildan ziyod vaqt davomida qidiruvda bo‘lib, o‘z izini butunlay yo‘qotishga uringan edi.
Ma’lumotlarga ko‘ra, mazkur shaxs 1999 yilda O‘zbekistonni tark etgan va shundan keyin Afg‘oniston, Pokiston hamda Suriya hududlaridagi turli xalqaro ekstremistik gurhlar safiga qo‘shilib, jangovar harakatlarda qatnashgan. U radikal g‘oyalarni qo‘llab-quvvatlab, “hijrat” va “jihod”ni asosiy maqsad sifatida belgilagani xabar qilingan.
Keyingi yillarda u boshqa shaxs nomi bilan rasmiylashtirilgan soxta hujjatlardan foydalanib, turli davlatlarda yashirincha harakat qilgan. Shuningdek, u MDH davlatlaridan birida qo‘lga olingani va tez fursatda O‘zbekistonga ekstraditsiya qilingani ma’lum qilindi.
Hozirda ushbu fuqaroga nisbatan Jinoyat kodeksining bir qator og‘ir moddalari — 154 (yollanish), 155 (terrorizm), 159 (konstitutsiyaviy tuzumga tajovuz) hamda boshqa bandlar bo‘yicha jinoyat ishi ochilib, tergov jarayonlari olib borilmoqda.
Tegishli idoralar ta’kidlashicha, O‘zbekistonda qonun ustuvorligi mutlaq hisoblanadi va kim bo‘lishidan qat’i nazar, sodir etilgan har bir jinoyat uchun javobgarlik muqarrar. Tergov amallari yakunlangach, ushbu shaxsning taqdiri sud hukmi bilan belgilanadi.
Mazkur holat xavfsizlikka oid muammolarga nisbatan mamlakatning qat’iy va tizimli pozitsiyasini yana bor ko‘rsatib berdi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
