Toshkent shahri va Surxondaryo viloyatidagi Davlat xavfsizlik xizmati tomonidan giyohvandlik vositalarining noqonuniy aylanmasiga qarshi muvaffaqiyatli tezkor tadbirlar amalga oshirildi.
Ma’lumotlarga ko‘ra, Surxondaryo viloyatidagi DXX va IIB xodimlari tomonidan o‘tkazilgan tezkor tadbirda Termiz shahrida tug‘ilgan 40 yoshli shaxs o‘zining boshqaruvidagi Cobalt avtomashinasida 50 kg 978 gramm gashish moddasini tashib ketarkan, ushlangan. Shuningdek, uning yashash joyidan 186 gramm gashish moddasi ham topilgan.
Ushbu shaxs bilan birga, 39 yoshli sherik ham ushlangan. Ularning afg‘onistonlik narkokurerlar orqali O‘zbekistonga o‘tkazilgan giyohvandlik vositalarini kelgusida sotish uchun olib kelganliklari ma’lum bo‘ldi. Ushbu shaxslarning biri, shu turdagi jinoyatlar uchun, ikkinchisi esa firibgarlik uchun ilgari sudlangan.
Toshkent shahrida ham shunga o‘xshash holat kuzatildi. Uchtepa tumanidagi 25 yoshli shaxs Telegram orqali sintetik giyohvandlik vositalari sotish bilan shug‘ullanganligi aniqlandi. U, DXX Toshkent shahar bo‘yicha boshqarmasi va shahar IIBB xodimlari tomonidan o‘tkazilgan tezkor tadbirda 225 gramm "Al’fa PVP" sintetik narkotik moddasi bilan qo‘lga olindi.
Shuningdek, uning 20 yoshli tanishi ham 2 dona “Regapen” dori vositasi bilan ushlangan. Mazkur dori vositalarini Mirzo Ulug‘bek tumanidagi dorixonalardan biridan sotib olgani aniqlandi. Tezkor tadbir davomida ushbu dorixonaning norasmiy sotuvchisi 14 dona “Regapen” dori vositasini mijozga 1 mln 200 ming so‘mga sotgan vaqtida ushlangan. Shuningdek, dorixonaning yordamchi omborxonasidan 20 200 dona “Gabaten”, 823 dona “Regapen”, 100 dona “Galara”, 4 dona “Torgabalin” kabi tarkibida kuchli ta’sir qiluvchi moddalar saqlovchi, tegishli hujjatlari bo‘lmagan dori vositalari ham ashyoviy dalil sifatida olingan.
Barcha shubhali shaxslar haqida Jinoyat kodeksining tegishli moddalariga muvofiq jinoyat ishi qo‘zg‘atilib, qamoqqa olish ehtiyot chorasi qo‘llanildi. Hozirda tergov jarayoni olib borilmoqda.
Bu tadbirlar giyohvandlik vositalari tarqatilishiga qarshi kurashdagi muhim qadam bo‘lib, mamlakatimizdagi xavfsizlik va tartibni ta’minlashga qaratilgan qator chora-tadbirlarning amalga oshirilishida muhim rol o‘ynaydi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
