Oliy Majlis Qonunchilik palatasi deputati va “Milliy tiklanish” partiyasi raisi Alisher Qodirov Rossiyaning Xabarovsk shahrida OMON xodimlari tomonidan O‘zbekiston fuqarosining kaltaklab o‘ldirilishi haqida xabarlarning yoritilishiga munosabat bildirib, Rossiyadagi vatandoshlariga murojaat qildi.
Qodirovning ta’kidlashicha, Rossiyadagi vaziyat har kuni yomonlashib bormoqda va bu ahvolga rus maxsus xizmatlari faqat Markaziy Osiyo xalqlarini ayblamoqda. U Rossiyada yashashni davom ettirayotgan vatandoshlariga tezroq mamlakatni tark etishni tavsiya qildi.
"Ishoning, vaziyat oy sayin faqat yomonlashadi. Rus maxsus xizmatlari markaziy osiyoliklarni Rossiyada kutilayotgan notinchliklarning faol ishtirokchisi sifatida taxmin qilmoqda. Shu sababli ulardan keladigan foydadan allaqachon kechib bo‘lingan", — deb yozdi Qodirov o‘zining Telegram-kanalida.
Shu bilan birga, Qodirov Rossiyadan ketishning ahamiyatini qayta-qayta ta’kidlab, "Aqlingizni ishlating, Rossiyadan tezroq keting! Hech qanday daromad ota-onalar va farzandlaringizning ko‘z yoshiga arzimaydi!" — deb murojaat qildi.
Bu xabari bilan Qodirov, o‘zbeklarning hayoti va xavfsizligini himoya qilish, ularning oilaviy baxtliligiga e’tibor qaratishni istamoqda.
“Zamin”ni Telegramʻda oʻqing!
