O'zbekiston huquq-tartibot organlari mamlakatdagi kriminogen vaziyatni barqarorlashtirishga qaratilgan maxsus operatsiyaning oraliq natijalarini ma'lum qildi. 20 yanvardan buyon Davlat xavfsizlik xizmati Ichki ishlar vazirligi bilan hamkorlikda respublika bo'ylab tezkor-qidiruv tadbirlarini o'tkazmoqda. Bu haqda podrobno.uz xabar beradi.
Shu davr mobaynida 2 mingdan ortiq reyd o‘tkazilib, tizimli ravishda noqonuniy faoliyat bilan shug‘ullangan 18 ta uyushgan jinoiy guruh faoliyatiga chek qo‘yildi. Turli jinoyatlarda gumon qilingan yana 51 ta guruhga nisbatan qat’iy protsessual choralar ko‘rildi.
Tekshiruvlar chog‘ida aniqlangan qurol-aslaha zaxirasi huquq-tartibot idoralarini jiddiy xavotirga solgan: 104 dona o‘qotar qurol, qariyb ming dona o‘q-dori hamda 1,5 kilogramm portlovchi modda ashyoviy dalil sifatida olib qo‘yildi.
Noqonuniy giyohvandlik aylanmasiga qarshi kurashda ham sezilarli natijalarga erishildi. 123 kilogramm taqiqlangan modda musodara qilindi, 57 ming dona psixotrop va kuchli ta’sir qiluvchi dori vositalarining tarqalishi oldi olindi. “Sintetika” va og‘ir turdagi narkotiklarning savdo kanallarini to‘sish aholi salomatligini himoya qilish hamda jinoiy tuzilmalar moliyalashtirilishini cheklash yo‘lidagi muhim qadam sifatida baholanmoqda.
Aniqlangan barcha holatlar bo‘yicha tergov harakatlari davom etmoqda. Huquq-tartibot organlari yashirin kriminal unsurlarni fosh etish ishlari tunu kun olib borilayotganini, asosiy ustuvor yo‘nalish esa fuqarolar xavfsizligini ta’minlash va jamoat tartibini saqlash ekanini ta’kidladi.
“Zamin”ni Telegramʻda oʻqing!
