Xalqaro Press-klubda “Ipoteka-bank” rahbariyati, mas’ul xodimlari, uy-joyga ehtiyojmand aholi vakillari, shahar xokimiyati vakillari va ommaviy axborot vositalari ishtirokida o‘tkazilgan anjumanda aholini uy-joy bilan ta’minlash va ipoteka kreditlari xususida so‘z bordi. Bu haqda “Ipoteka-bank” matbuot xizmati xabar qildi.
Xabarda aytilishicha, ko‘p kvartirali uylarni qurish va rekonstruksiya qilishga buyurtmachilarga kreditlar berish, ko‘p kvartirali uylarni sotib olish uchun qarz oluvchilarga ipoteka kreditlarini rasmiylashtirish yo‘li bilan kvartiralarni sotish funksiyalarini yuklagan holda "Ipoteka-bank" – moliyalashtiruvchi tijorat banki sifatida belgilangan.
2017 – 2020 yillarga mo‘ljallangan dastur asosida shaharlarda tegishli muhandislik va ijtimoiy infratuzilmalariga ega bo‘lgan 5, 7 va 9 qavatli, energiyadan samarali foydalaniladigan 945 ta ko‘p xonadonli uy-joy bunyod etilishi rejalashtirilgan. Shundan joriy yilga mo‘ljallangan 191 ta uy-joy (jumladan, 102 tasi poytaxtda) bo‘yicha qurilish ishlari davom etmoqda.
Bu kabi uy-joylarga ega bo‘lish uchun fuqarolarga aniq talablar qo‘yilgan. Jumladan, uy-joy oluvchi Qoraqalpog‘iston Respublikasi, viloyatlar shaharlari va Toshkent shahrining tuman hokimliklarida tashkil etilgan hududiy komissiyalarga ariza bilan murojaat etishi lozim. Komissiyaning ijobiy xulosasiga ko‘ra, ko‘p qavatli uy-joydagi xonadonlardan biri fuqaroga biriktiriladi. Shu vaqtning o‘zida xonadon qiymatining kamida 25 foizi miqdoridagi summa boshlang‘ich badal sifatida “Ipoteka-bank” filiallarida shakllantirilishi zarur. Uy-joy qurib bitkazilgach esa, biriktirilgan xonadonni sotib olish istagidagi fuqaro bankka qator hujjatlar, jumladan, ariza, kredit oluvchining pasport nusxasi, kredit oluvchining oxirgi 12 oy davomida olgan daromadlari to‘g‘risidagi ma’lumotlarni taqdim etadi.
Uy-joy sharoitini yaxshilashga muhtoj jismoniy shaxslarga ko‘p kvartirali uy-joydagi xonadonni sotib olish uchun ipoteka kreditlari 20 yil muddatga, 3 yil imtiyozli davr bilan, kreditdan foydalanganlik uchun dastlabki 5 yil davomida yillik 7 foiz va qolgan davrda O‘zbekiston Respublikasi Markaziy bankining qayta moliyalash stavkasi miqdorida ajratiladi. Bunda bank sotib olinadigan uy-joy umumiy qiymatining 75 foizi miqdorigacha bo‘lgan summani qarz oluvchiga kredit sifatida beradi.
Yuqoridagi qarorda kredit oluvchi uchun ham qator soliq imtiyozlari ko‘zda tutilgan. Bunda kredit oluvchining o‘zi yoki oila a’zolarining kredit bo‘yicha oylik to‘lovlarni qaytarish uchun yo‘naltirgan mablag‘i soliqqa tortilmaydi. Agar korxonalar qaytib olmaslik sharti bilan o‘z xodimlariga ipoteka kreditining boshlang‘ich badalini to‘lab bergan bo‘lsa, mazkur mablag‘ ham soliqqa tortilmaydi. Shuningdek, kredit to‘liq qaytguniga qadar xonadon uchun mol-mulk solig‘i to‘lanmaydi.
“Zamin” yangiliklarini “Youtube”da kuzatib boring
Ctrl
Enter
Xato topdIngizmi?
Iborani ajratib Ctrl+Enter tugmasini bosingMavzuga oid yangiliklar
Turkiyaning Harper's Bazaar nashri yil ayolini aniqladi (foto)
KXDR yetakchisi dronlarni ommaviy ishlab chiqarishni yo‘lga qo‘yishni buyurdi
Shols va Putin o‘rtasidagi suhbat Kiyevga signal bo‘ldi
Rossiyalik deputat: «Oliy ma’lumotlilarning kurerlik qilishi — vatanparvarlikka zid»
Jo Bayden: “Ba’zan xotinim meni kosmosga jo‘natish bilan tahdid qiladi”
Ayrim boshqaruv servis kompaniyalari shartnomalarida asossiz shartlar belgilangani aniqlandi
20 yoshli o‘zbekistonlik qizni qarindoshi Turkiyaga sotib yubordi
Bayden va Jinping Peruda uchrashdi: «Agar bir-birimizni raqib deb bilsak, munosabatlarni buzamiz»
