Chilonzorda bir guruh kimsalar bir yigitni do‘pposlashdi

So‘nggi vaqtlarda Toshkent shahrida o‘zga kimsani qasddan kaltaklash holatlari haqida tez-tez quloqqa chalinyapti. Afsuski, bu harakatga qarshi choralar ko‘rilayotgan bo‘lsa-da, bu holatlar kamaymayapti.

Shu yilning 1 sentyabr kuni kechasi taxminan soat 23:00 larda Chilonzor tumani, Cho‘ponona ko‘chasida joylashgan 11-uyning yonida fuqaro Karimjon Qobiljonovni noma’lum kimsalar kaltaklab, unga tan jarohati yetkazishgan.

Natijada Karimjon Qobiljonov Respublika shoshilinch tez tibbiy yordam ilmiy markaziga olib ketilgan.

Yuz bergan voqea yuzasidan Chilonzor tumani IIB huzuridagi tergov bo‘limi Jinoyat kodeksining 277-moddasi 2-qismi “b” bandi, ya’ni bezorilik, bir guruh shaxslar tomonidan jamiyatda yurish-turish qoidalarini qasddan mensimaslik, urish-do‘pposlash aybi bilan jinoyat ishi qo‘zg‘atdi.

Aniqlanishicha, Karimjon Qobiljonovni 1 sentyabr kuni Kamron Xismatov, Anvar Ixtiyorov, Davron Abdullayev va Kamron Abduqahhorov kaltaklagan.

Ayni paytda mazkur holat yuzasidan dastlabki tergov harakatlari olib borilmoqda.
(Jabrlanuvchining anketa ma’lumotlari o‘zgartirilgan)

Manba: Qalampir.uz “Zamin” yangiliklarini “Vkontakti”da kuzatib boring