Qator internet nashrlari singari biz ham Buxoroda yo‘lga qo‘yilgan yangi ko‘ngilochar dastur haqida «Buxoroda havoda muallaq turuvchi darvesh paydo bo‘ldi» sarlavhali xabar e’lon qilgandik. Bu xabar saytlar ortidan ijtimoiy tarmoqlarda ham aylana boshladi va odatdagidek ko‘pchilik o‘z izohlarini qoldirishga kirishdi.
Izoh egalarining aksariyati bu attraksion ko‘zbo‘yamachilik ekanligi, darvesh aslida hassasiga suyanib turganligi, imkon tug‘ilganda shartta fosh qilib tashlashi mumkinliklarini bildirishgan. Ayrimlar hatto suratlarni ham qoldirishgan, bu attraksion sirini ochuvchi videolavhalarni ham joylashtirganlar va hatto o‘zlari ham bu ishni qilishlari mumkinligini isbotlashga uringanlar.
Aziz zamondosh!
Xohlaymizmi, yo‘qmi, savol tug‘iladi: siz shu izohlarni jiddiy yozayapsizmi?
«Fazoviy kemalar koinotni zabt etayotganda...» deyilgan jumla ishlatilgan film chiqqaniga ham ellik yil bo‘layotgan bir paytda, biz juda maydalashib ketmayapmizmi?
Bu beqiyos zakovatingiz, aqlingiz bilan teatrdagi shoh aslida shoh emas, oddiy aktyor ekanligini, multfilmdagi bo‘rining quyonda hech qanday xusumati yo‘qligini, bo‘lganida allaqachon tutib yeb qo‘yishi mumkinligini isbotlashingiz ham hech gap emas. Shuningdek kinodagi Jan Klod van Damm ringga chiqqanda raqibini chindan tepmasligini, daryoga oqizilgan Tohir Xorazm malikasi qo‘liga tushgunicha sandiqning ichida allaqachon dimiqib o‘lib qolishini istehzo qilish mumkin, bemalol mumkin, ishonavering!
Vatandosh! Sal kengroq bo‘ling. Fikrlash bolalarcha ekanligi kamlik qilgandek, buni oshkora etishga shoshilmang.
Umuman, har qanday yangilikdan, har qanday g‘oyadan faqat salbiy jihat izlash, kamsitishga urinish kayfiyatidan qutulish lozim. Siz bilimdonlarcha fikr yuritadigan «Facebook» ijtimoiy tarmog‘i asoschisi Mark Sukerberg g‘oyasi uchun sarmoyador izlab necha kishining eshigini taqillatgan. Sevimli «Ayfon»larimiz «ota»si Stiv Jobs kompaniyasini bankrotlikdan qutqarish uchun puldor odamlarga qancha sarg‘aygan.
Agar biz har qanday loyihani masxaralash ruhida kutib olsak, o‘zimizni bu kabi ishga kirishganlardan aqlli hisoblasak, rivojlanishni g‘ippa bo‘g‘amiz. O‘z qo‘llarimiz bilan, zahar tillarimiz bilan bo‘g‘amiz, tamom! Chunki o‘zimiz qilmaymiz, qilganni ham kamsitamiz, qo‘limizdan kelgani shu-da.
Yana bir savol: kimdir shu attraksionni olib kelib ishlatish g‘oyasini amalga oshirdi. Siz uni kalaka qilishdan o‘zga nima qilgansiz bu hayotda? Istehzolar ortidan erishgan yutuqlaringiz bilan ham bir o‘rtoqlashib yubormaysizmi?
Xorijda «aqlli»larga bir savolni berishni xush ko‘rishadi, shuni bizga ham tatbiq etish vaqti keldi shekilli: «Agar sen shunchalar aqlli bo‘lsang, ayt-chi, nega hamon kambag‘alsan? Nega o‘z loyihang ustida bosh qotirmay, boshqalarni g‘iybat qilib yuribsan?».
Qani, shoshilmay bir javob berib ko‘raylik-chi!
Abror Zohidov
Manba: Xabar.uz “Zamin” yangiliklarini “Vkontakti”da kuzatib boring
Ctrl
Enter
Xato topdIngizmi?
Iborani ajratib Ctrl+Enter tugmasini bosingMavzuga oid yangiliklar
Organizm o‘zini toksinlardan qanday tozalaydi?
20 yoshli o‘zbekistonlik qizni qarindoshi Turkiyaga sotib yubordi
KXDR yetakchisi dronlarni ommaviy ishlab chiqarishni yo‘lga qo‘yishni buyurdi
Bayden va Jinping Peruda uchrashdi: «Agar bir-birimizni raqib deb bilsak, munosabatlarni buzamiz»
Shols va Putin o‘rtasidagi suhbat Kiyevga signal bo‘ldi
Turkiyaning Harper's Bazaar nashri yil ayolini aniqladi (foto)
Buyrak salomatligi uchun eng foydali sabzavot...
Ayrim boshqaruv servis kompaniyalari shartnomalarida asossiz shartlar belgilangani aniqlandi
