Toshkent shahri bosh militsioneri va shahar prokurori tanqidga uchradi

^{Fotokollaj: Gazeta.uz / «Daryo»}
23 noyabr kuni Shayxontohur tumanida bo‘lgan prezident Shavkat Mirziyoyev poytaxtda jinoyatchilik holatlari oshgani haqida gapirib, shahar IIBB boshlig‘i hamda shahar prokurori faoliyatini tanqid ostiga oldi.

«Toshkentdagi jinoyatchilik bo‘yicha vaziyatni men aytmay, sizlar eshitmang. Jinoyatchilar orasida «soliqchilar» paydo bo‘ldi hozir. Ular bozorlardan soliq undirishyapti, davlatdan alohida soliq oladigan guruhlar paydo bo‘lgan. Men yer tagida ilon qimirlasa bilaman. Biz bundaylarni darhol jilovlashimiz kerak, jilovlaymiz ham», deya prezidentning so‘zlarini keltirmoqda Kun.uz muxbiri.

Shavkat Mirziyoyev Toshkent shahar IIBB boshlig‘i hamda shahar prokurori faoliyatini yetarli bo‘lmayotganini aytib, ularni keskin tanqid qildi.

«Ularga bu lavozim jinoyatchilikning oldini olish uchun berilgan. Biz ularni jilovlamasak, ular bizni jilovlaydi ayrim davlatlardagi kabi.

Jinoyatlarning 75 foizi yoshlar tomonidan sodir etilyapti. Jinoyatlarning, korrupsiyaning oldini olish uchun mahalla bilan hamkorlikda ishlash kerak», deya ta’kidladi Mirziyoyev.

Ma’lumot uchun, Toshkent shahar Ichki ishlar bosh boshqarmasiga 2020 yildan buyon Aziz Toshpo‘latov rahbarlik qilmoqda.
Toshkent prokurori lavozimida 2021 yil fevralidan buyon Ulug‘bek Qosimov ishlamoqda.

Shaharda to‘rtinchi sektor rahbari esa yangi — Toshkent shahrining avvalgi bosh soliqchisi Navoiy viloyatiga hokim bo‘lib ketgach, shu yilning 16 noyabrida Yunusjon Nasimjonov Toshkent shahar davlat soliq boshqarmasi boshlig‘i lavozimiga tayinlangandi. “Zamin” yangiliklarini “Vkontakti”da kuzatib boring